د پېغلو ' زهره ' ډله هېواد ته ستنه شوه

د افغان ښځینه وو لومړنۍ ارکسترا 'زهره ' ډله د پنجشنبې په ورځ هېواد ته ستنه شوه او د کابل په هوايي ډګر کې یې مینه والو تود هرکلی وکړ.

د زهره ارکستر د موسیقۍ برخې ' فریموس ' یا د موسیقي 'آزاده الهې جایزه ' په سویس کې ترلاسه کړه.

دا په افغانستان کې لومړنۍ د موسیقي ډله ده چې ټولې غړې یې نجونې دي. د زهره آرکستر ډلې د اروپا په پنځو ښارونو کې نندارې ترسره کړې او له یوې نړیوالې جایزې سره په داسې حال کې هېواد ته ستنېږي چې هیڅ غړی یې هم نه دی کم شوی.

دغې آرکسټر ډلې په داووس کې د ډېر شمېر لیدونکو او اورېدونکو زړونو ته لار وموندله او ننداره کونکو ته یې افغاني او بهرنۍ سندرې وړاندې کړې.

د دغې ارکسترا یوې غړې نګین خپلواک بي بي سی ته وویل، کله چې موږ دا جایزه واخیسته و مو ویل چې تر دې لوړې هم اخیستی شو، ځکه موږ زیار باسو. افغان مېرمنې ډېرې زیارکښې دي.

د افغانستان د موسیقي انسټیټیوت بنسټ اېښودونکی احمد سرمست د دغې جایزې د ارزښت په اړه وايي:

''کله چې د نجونو یوه ډله د نړۍ پر سترو دریځونو خپل هنر نندارې ته وړاندې کوي، کولای شي د افغانستان ښکلی انځور او مثبت بدلونونه چې دلته راغلي دي خلکو ته وښيي او بله دا چې که موږ لرغونې افغان موسیقي له اروپايي موسیقۍ سره یو ځای کوو، نو د افغانستان لرغونې موسیقۍ ساتلو ته موږ ژمن ساتي او هم د موسیقۍ بېلابېلو ډولونو او د بیان آزادۍ ته زموږ ژمنتیا ښيي. ''

د زهره په ارکستر کې له ۱۳ تر ۲۰ کلنو پورې ۳۵ نجونې شته چې ځینې یې یتیمې او د بې وزلو کورنیو غړې دي.

د دغې ډلې سفر تېره میاشت له داووس نه پیل شو او وروسته په جرمني کې پای ته ورسېد.