د ننګرهار مومندره کې ډوبه شوې کښتۍ؛ د نهو کسانو مړي موندل شوي
د افغانستان ختیځ ننګرهار مومندرې ولسوالۍ باسول سیمه کې د شنبې په ګهیځ یوه کښتۍ په سېند کې ډوبه شوې چې د ښځو او ماشومانو په ګډون ۳۱ کسان پکې سپاره وو، تر اوسه د اتو تنو ډوبو شویو کسانو جسدونه موندل شوي.
پېښه نن ګهیځ د ننګرهار مومندرې ولسوالۍ اړوند باسول سیمه کې شوې.
د ننګرهار د اطلاعاتو امر باختر اژانس ته ویلي، د پېښې له ځایه د مومندرې روغتیايي کلینیک ته ۱۱ ټپیان راوړل شوي چې درې کسان د نازک روغتیايي حالت له امله د ننګرهار سیمهییز روغتون ته لېږدول شوي.
د هغې سیمې یوه ځايي امام خلیل الله بيبي سي پښتو پاڼې ته وویل، چې تر دې مهاله د نهو کسانو مړي موندل شوي چې ښځې او ماشومان هم په کې شته.
د ورکو شویو کسانو د شمېر په اړه بېلا بېلې خبرې کېږي. ځینې ځایي خلکو بي بي سي ته ویلي، چې د درې کسانو مړي ورک دي.
خو د طالبانو چارواکو بیا دا شمېر لس ښودلی دی. هممهاله ژغورندویه ډلې په سیمه کې په لټون بوختې دي.
وړاندې، د ننګرهار ولایت د پېښو پر وړاندې د مبارزې مشر مولوي عمر خالد باختر خبري اژانس ته په دې پېښه کې د ۲۰ تنو د وژل کېدو پخلی کړی و.
په ډوبو شویو کسانو کې ښځې او ماشومان هم دي.
له ډوبې شوې کښتۍ یو تن ژغورل شوی شېرزاد احمدخېل وايي، دا چې د کښتۍ ظرفیت کم و، خو وايي له ناچارۍ ډېر کسان پکې کښېناستل او د سېند نیمايي ته په رسېدو د کښتۍ جنراتور ته اوبه ورغلې او ګل شو، کښتۍ ته اوبه ننوتې او کښتۍ په اوبو کې ډوبه شوه.
ښاغلي احمدخېل باختر خبري اژنس ته ویلي، هر یو ډوب شوی د خپل ځان په غم کې شو او د بل چا مرسته هېچا نه شوای کولی یو څو نارینه د سېند غاړې ته راووتلو، خو ښځې او ماشومان اوبو پسې اخیستې وو، بله کښتۍ مو پکې راوستله او ځینې کسان مو د سېند غاړې ته راویستل.
له دې مخکې د ننګرهار عامې روغتیا ریاست کې بېړنیو پېښو ته د رسېدو څانګې مسوولینو له قوله ویل شوي وو، چې په لومړنیو رایستل شویو جسدونو کې یو نارینه، یوه ښځه، دوه هلکان او یوه نجلۍ شامل وو.
د عکس سرچینه، خلیل الله
د عکس سرچینه، خلیل الله
د افغانستان د ځینو نورو ولايتونو په څېر د ننګرهار بهسودو، ګوشتې او لالپورې ولسوالۍ اوسېدونکي هم د پلونو د نشتوالي له امله له سيندونو د پورې وتلو لپاره کوچنۍ کښتۍ کاروي.
د یادونې ده چې له دې وړاندې هم د ننګرهار په مومنددرې او بهسودو کې د کښتیو ډوبېدو پېښې رامنځته شوې، چې یو شمېر کسانو پکې ژوند بایللی دی.
په افغانستان کې د دوبي په ګرمو ورځو کې ځینې کسان خپل ژوند په سیندونو کې د لامبو او یا هم له سینده د تېرېدو پرمهال بایلي ځکه چې پلونه نشته او دغه مهال د سیندونو اوبه ډېرېږي.
