د بښنې نړيوال سازمان: پاکستان دې پر پښتون ژغورنې غورځنګ بنديز سملاسي لرې کړي
د عکس سرچینه، Getty Images
د بښنې نړيوال سازمان (امنسټي انټرنشنل) د پاکستان له حکومته غوښتي چې سملاسي پر پښتون ژغورنې غورځنګ لګول شوی بنديز لغوه او د دغه غورځنګ د فعالانو او احتجاج کوونکو د ځورولو مخنیوی وکړي.
ياد سازمان د پاکستان د حکومت له لوري پر پښتون ژغورنې غورځنګ بنديز او د ترهګرۍ ضد قوانينو کارول غندلي دي. د دغه سازمان د جنوبي اسيا مشر بابو رام پنت، دا بنديز د سوله ييزو احتجاجونو د ځپلو او د اکټوبر د ۱۱ غونډې د مخنیوي هڅه بللې ده.
په بيان کې راغلي چې "کلونه کېږي پاکستاني چارواکي د مظلومو سيمو خوځښتونه په زور، جبري بې درکیو او د رسنيزو بنديزونو له لارې ځپي."
د پاکستان مرکزي حکومت څو ورځې وړاندې د يوه رسمي اعلان له مخې پر پښتون ژغورنې غورځنګ بنديز اعلان کړ او د پښتون ژغورنې غورځنګ يې "د پاکستان د کورني امنيت لپاره ګواښ" وباله.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
له دغه بنديز وروسته، د پښتون ژغورنې غورځنګ مشر منظور احمد پښتين د پاکستان حکومت دا پرېکړه "ظالمانه تګلاره" وبلله او ويلي يې وو چې د "فدرالي حکومت له دې اعلان سره د پښتنو پر وړاندې د دښمنۍ ټولې پولې ماتې کړې."
د پښتون ژرغورنې غورځنګ راتلونکي جمعه د "پښتنو قومي عدالت" په نامه لویه جرګه په خيبر کې رابللې او ورته وروستۍ چمتووالی نیسي.
له دې مخکې منظور پښتین او د غورځنګ ګڼو نورو فعالانو بیا بیا ادعا کړې چې د پاکستان حکومت د جرګې پر وړاندې له هرو ممکنه خڼدونو کار اخلي.
ښاغلي منظور له دې وړاندې ګواښ کړی و چې پښتانه به په هر قیمت دا جرګه کوي او د خپل راتلونکي غم به خوري.
منظور پښتين يوه اعلاميه کې ويلي، دې جرګه کې به له ۳۰ زرو ډېر سيمه ييز او قومي مشران، پوهان او د اغېز څېرې، د ګوندونو مشران او پښتون ټولنې نور بېلابېل استازي سره راټولیږي.
