د هرات زلزله د تصویر په ژبه؛ د ژغورنې چارې، جنازې او د مرستو اړتیا

نن درېیمه ورځ هم په هرات کې د زلزلې له کبله د نامالوم شمېر کسانو مړي‌ تر خاورو لاندې پټ پاتې دي. سیمې ته رسېدلي خلک د مړو پر رایستلو، جنازو او مرستندویه چارو بوخت دي. هلته د روان وضعیت څرک په دې انځوریزه ټولګه کې کتلی شئ:

د ژغورنې او مړو رایستلو چارې:

که څه هم د درو ورځو په تېرېدو سره د دې امکان اوس ډېر کم ښکاري چې لا دې هم تر ویجاړۍ او خاورو لاندې څوک ژوندي پاتې وي خو د ژغورنې او د مړو د رایستلو چارې روانې دي.

جنازې او ډله‌ييز قبرونه:

تر اوسه د هرات په زلزلو کې د وژل شویو کسانو کره شمېر نه دی په ډاګه شوی، پرون د طالبانو حکومت چارواکو شاوخوا دوه نیم زره وژل شوي او زرګونه ټپیان یادول خو نن یې مخکېنۍ شمېرې ناسمې او د مړو شمېر تر زرو او د ژوبلو تر دوو زرو اوښتی بللی دی.

ویجاړی:

د شنبې ورځې زلزله چې د رېختر په کچه ۶ اعشاریه ۳ درجې ښودل شوې، له ځانه سره څو پرله پسې ټکانونه هم درلودل چې ویجاړی یې ډېر کړی. تر ټولو ډېر ځاني او مالي زیان د زنده جان او غوریان ولسوالیو اړوند کلو کې اوښتی.

مرستې او اړتیاوې:

له زلزلې د ژوندیو پاتې شویو ټپیانو درملنه روانه ده او ځينو کورنیو سره د خوراکي او سرپناه مرسته شوې خو ښکاري چې کافي نه ده. د دې تر څنګ سیمې ته بېلابېلې روغتیا ډلې او نور مرستندویان رسېدلي، په کور دننه او بهر له زلزله ځپلو سره د مرستې لپاره کمپاینونه پیل شوي خو ویجاړي او خلکو ته اوښتي زیان ته په پام ښکاري چې د خلکو اړتیاوې ډېرې دي.