د ایټالیا په ونیز کې د امازون موسس جیف بیزوس او لارن سانچز د واده شاندار مراسم

د فلم او ټلویزیون له هنرمندانو نیولې د شاهي کورنیو تر غړو او د نړۍ مشهورو شخصیتونو د امازون موسس جیف بیزوس او لورن سانچز د واده په مراسمو کې ګډون کړی و.

لیوناردو ديکپریو، اشر او ایوانکا ټرمپ له هغو مشهورو کسانو وو، چې په دې مراسمو کې یې برخه درلوده، چې پر پنجشنبه او جمعه ورځو د ایټالیا په دې ښار کې ترسره شول.

په پام کې ده، دغه مراسم به درې ورځې دوام کوي او نن شنبه شپه به د دې جوړې او سلګونو مېلمنو لپاره له یوې سترې مېلمستیا وروسته پای ته ورسېږي.

د ونیز ښار ځینو فعالانو په ګډون چې د سېلګرۍ پراخو څپو ضد دي، د اقلیمي بدلون فعالانو هم له دې مراسمو سره مخالفت څرګند کړی.

۵۵ کلنه سانچز چې د دولچه او ګابانا برانډ واده کالي یې اغوستي په هغه تصویر کې چې پر انسټاګرام خپور شوی، په داسې حال کې خاندي چې د ۶۱ کلن بیزوس ترڅنګ ولاړه ده.

د دې واده لګښت په هکله څه نه دي ویل شوي، خو اټکل کېږي، چې له ۲۰ تر ۵۰ میلیونو ډالرو پورې به ورسېږي.