غزل اکمل له کابله

	د المپيک نړيوالې سيالۍ د لومړي ځل لپاره په ١٨٩٦ کال کې د يونان آتن په ښار کې ترسره شوى.

ټاکل شوى ده دوى چې يوه ښځه او درې نارينه په کې دي د ځغاستې او تکواندو په برخو کې سيالي وکړي .

د المپيک نړيوالې سيالۍ په هرو څلورو کلونو کې يو ځل د نړۍ په يو هيواد کې ترسره کيږي چې د ٢٠٠٨ ميلادي کال د المپيک د نړيوالو سياليو کوربه د چين هيواد دى .

په تيرو شپږو کلونو کې د ورزش په بيلابيلو برخو کې د افغان لوبغاړو ځليدنه دغه هيواد د نړيوالو سيالانو په کتار کې درولى دى .

د چين په څلورو ښارونو کې د ٢٠٠٨ کال د المپيک په نړيوالو سياليو کې د افغانلوبغاړو گډون چې د ځغاستې او تکواندو په برخو کې به سيالۍ وکړي افغانان هيله من کوي چې دا ځل بيا افغان لوبغاړي د پام وړ لاسته راوړنو سره خپل هيواد ته راستانه شي .

د المپيک مرستيال سيد محمود ضيا دشتي چې د چين په سياليو کې د افغان پلاوي مشري کوي وايي که څه هم افغان لوبغاړي لازمې آسانتياوې نلري خو دوى هيله من دي چې په دغو سياليو کې برى ترلاسه کړي :

''افغانستان ددې توان نلري چې د پرمختللو هيوادونو لکه د اروپايي ، شمالي امريکا او يا د آسيا د بډاى هېوادونو لکه کوريا ، چين او جاپان په شان لوبغاړي چمتو او وروزي .
په ورزشي برخو کې درې مداله ويشل کيږي د سرو ، سپينو زرو او برنزو، که دغه مدالونه د نړۍ په بډاى هيوادونو وويشو نو دوه په دريمه برخه هيوادونه له دغو سياليو تش لاس بيرته خپل هيواد ته ځي .

افغان لوبغاړو هم کله کله ښيې لاس ته راوړنې لرلي په ځانگړې توگه په تکواندو کې ، او س هم هيله من يو چې په دغه برخه کې ښه وځليږي''.

له دى وړاندى افغان لوبغاړي د نړۍ او سيمې په کچه په دى توانيدلي چې د کريکت او تکواندو په سياليو کې د پام وړ برياليتوبونه ترلاسه کړي .

د المپيک په نړيوالو سياليو کې څلور افغان لوبغاړي گډون کوي چې د ځغاستې په برخه کې يوه افغانه نجلې هم په کې شامله ده .

د المپيک نړيوالې سيالۍ د لومړي ځل لپاره په ١٨٩٦ کال کې د يونان آتن په ښار کې ترسره شوى.

د ٢٠٠٨ ميلادي کال د المپيک نړيوالې سيالۍ د اگست له اتمې نه تر ٢٤ نيټې پورې په چين کې ترسره کيږي.

افغانستان په ١٩٣٦ کال کې د المپيک په نړيوالو سياليو کې غړيتوب ترلاسه کړ چې يوازې د مجاهدينو او طالبانو د واکمنۍ پر مهال يې ونکړاى شول په دغو سياليو کې گډون وکړي .