حنان حبيبزى له کابله

	ځينې منتقدين وايي دافغانستان روان کړکيچ دطالب وسله والو او نورو جنگي ډلو دريځ کمزورى کړى نه دى او برعکس لا يې پياوړى کړى دى .

اوربند او ددولت له مخالفينو سره خبرې ،د بيارغاونې د کارونو هراړخيز چټکوالى د ټولنې د لسگونو غړو نورې غوښتنې جوړوي .

د سولې د ملي جرگې په نامه ټولنه وايي چې غړي يې د افغانستان د بېلابېلو پوړونو استازيتوب کوي او دوى د سولې د ټينگښت لپاره راپورته شوي دي .

بله اوونۍ په پاريس کې کېدونکى کنفرانس په افغانستان کې د ډېرى مدني او بشري ټولنو پام ځانته ور اړولى دى .

د افغانستان په لسگونو قومي مشرانو چې ځانونه يې د خلکو استازي او د سولې په نامه د جرگې غړي بلل د افغانستان په اړه له نړيوالې ټولنې د څرگند او پرېکنده دريځ غوښتنه وکړه.

دوى د يوه پرېکړه ليک په ترڅ کې د پاريس د کنفرانس له گډونوالو څخه وغوښتل چې په افغانستان کې د امنيت د ټينگښت مساله دخپلې اجنډا په سر کې راولي.

په دې پرېکړه ليک کې همداراز د اوربند پرمسالې ، د دولت له وسله والو مخالفينو سره پر خبرو اترو او له ټولو بهرنيو زندانونو څخه د افغان بنديانو پرخلاصون ټينگار وشو.

بله غوښتنه دا وشوه چې په افغانستان کې دې د بيارغاونې د چارو گړنديتوب ته لار اواره شي او کېدونکې مرستې دې په اغېزمنه توگه ولگول شي.

دوى د ملگرو ملتونو او افغان دولت په گډون د يو څارونکي پلاوي د جوړولو غوښتنه وکړه چې د مرستو دلگولو بهير وڅاري .

تېره اوونۍ دغې جرگې د يوې پراخې غونډې په ترڅ کې د افغانستان ددولت له وسله والو مخالفينو سره د خبرو اترو غوښتنه وکړه .

د جرگې غړو خپلې غوښتنې په داسې حال کې وړاندې کړې چې په افغانستان کې خرابېدونکي امنيتي حالت دخلکو اندېښنې ډېرې کړي دي .

ځينې منتقدين وايي د افغانستان روان کړکېچ د طالب وسله والو او نورو جنگي ډلو دريځ کمزورى کړى نه دى او برعکس لا يې پياوړى کړى دى .

دوى وايي که نړيواله ټولنه د افغانستان د راتلونکي په اړه هراړخيز او پرېکنده هوډ خپل نکړي ښايي ستونزې لاپسې ډېرې شي.