جعفر هاند له کابله

	د پاکستان د نوي حکومت تر جوړيدو وروسته کابل ته د پاکسان د بهرنيو چارو وزير محمود قريشي دا لومړى سفر دى چې ترسره کيږي.

ښاغلى قريشي پر همدغه ډول مسئلو په کابل کې له ولسمشر حامد کرزي او له خپل سيال ډاکټر رنگين دادفر سپنتا سره خبرې وکړې .

ده ژمنه وکړه چې اسلام اباد به د ترهگرۍ پر وړاندې جگړه کې د کابل کلک ملاتړ ته دوام ورکړي.

قريشي دغه راز ژمنه وکړه چې ډېر ژر به د پاک افغان د سولې د گډې جرگې د ٢٥ کسيزې پاکستانۍ جرگه گۍ د غړو نومونه په ډاگه کړي.

د پاکستان د نوي حکومت تر جوړېدو وروسته کابل ته د پاکسان د بهرنيو چارو وزير محمود قريشي دا لومړى سفر دى چې ترسره کيږي.

ښاغلى قريشي د يوې خبرې ناستې په ترڅ کې خپل افغان سيال ډاکټر رنگين دادفر سپنتا ته ډاډ ورکړ چې د ده په وينا له هغو باغي کسانو سره به هېڅکله هم جوړ جاړى ونکړي چې د سيمي او دواړو هېوادونو امنيت او ټيکاوخرابوي.

ده په خپل هېواد کې له طالب وسله والو سره د سولې د شوي تړون په اړه د کابل د اندېښنو په ځواب کې په ډاگه کړه چې پاکستان يوازې له هغو طالبانو سره تړون کړى چې خپلې وسلې يې په مځگه ايښې. د پاکستان قانون يې منلى او د سولې له بهير سره يوځاى شوي دي .

ده ټينگار وکړ چې حکومت به يې له هغو وسله والو سره چې د سيمي امنيت ته گواښ پېښوي د سولې د خبرو پر ځاى کلکه مبارزه وکړي :

'' موږ يوازې له هغو عناصرو سره تړون کووچې سوله غواړي او په خپله سيمه کې د ټيکاو او سوله ييز ژوند غوښتونکي دي.

موږ له تروريستانو او هغو کسانو سره چې د سولې پر وړاندې جنگيږي هېڅ ډول معامله هم نکوي .''

موږ بايد خلک سره نژدې کړي  موږ بايد سيمې او هېوادونه سره نژدې کړو نه بېل ، د ډيورنډ دواړو غاړو کې د ټولنيزې پراختيا شونتيا شته ، نړيواله ټولنه چمتو ده چې د دغو سيمو په پراختيايي چارو کې را سره مرسته وکړي موږ بايد خلک سره نژدې کړو. رنگين دادفرسپنتا

ښاغلي قريشي ترهگري او بنسټپالنه د سيمي او دواړو هيوادونو د امنيت لپاره ستره ننگونه وبلله او زياته يې کړه چې دواړه هيوادونه يې بايد د دغې نړيوالې ستونزې په وړاندې گډه مبارزه وکړي.

قريشي له افغانستان څخه د خپل يو نژدي او ورور گاونډي هيواد په توگه يادونه وکړه چې په باور يې په دغه هيواد کې امنيت د سيمي اوپاکستان په گټه دى.

د پاکستان د بهرنيو چارو وزير په خپلو خبرو کې هڅه کوله چې په سوات اووزيرستان کې د طالب وسله والو سره د شوي تړون په اړه د افغان حکومت اندېښنو ته په يو ډول ځواب ووايي.

خو افغان سيال يې د ده د دغو څرگندونو په اړه څه ونه ويل چې په قبايلي سيمو کې د وسله والو طالبانو او د هغه ځاى د حکومت ترمنځ څه موده وړاندې د سولې لاسليک شوي تړون پر افغانستان څه ډول اغېز کړى.

تر دې وړاندې افغان چارواکو ويلي و چې په وزيرستان او سوات کې د سولې شوي تړون وروسته په افغانستان کې د وسله والوباغيانو په بريدونو کې زياتوالى راغلى دى.

محمود قريشي د دواړو هېوادونو ترمنځ د اغزنو ديوالو او څارگرو کيمرو د لگولو په اړه وويل چې دغه کار به د افغان حکومت او نړيوالې ټولنې سره تر سلا مشورو وروسته کوي.

ده وويل د پاکستان او افغانستان د ازادې پولې له کبله کېداى شي د نويو پرمختللو وسايلو په لگولو سره د بنسټپالو او نورو وسله والو طالبانو د تگ راتگ مخه ونيول شي.

د ښاغلي قريشي د دغو څرگندونو په وړاندې افغان وزير رنگين دادفر سپنتا غبرگون دا و چې دغه کار به افغانستان ته د ترهگرو د راتلو مخه ونشي نيولى.

هغه دغه کار د دواړو هېوادونو د مېشتو قومونو ترمنځ د سولې د بيلتون وښود او وېويل دا کار به افغانستان ته د ترهگرو د تگ راتگ مخه ونشي نيولى:

'' موږ بايد سيمې او هېوادونه سره نژدې کړو نه بېل ، د ډيورنډ دواړو غاړو کې د ټولنيزې پراختيا شونتيا شته ، نړيواله ټولنه چمتو ده چې د دغو سيمو په پراختيايي چارو کې را سره مرسته وکړي موږ بايد خلک سره نژدې کړو.''

د پاکستان د بهرنيو چارو وزير دغه راز ژمنه وکړه چې ډير ژر به د امن د گډې جرگې ٢٥ کسيزې پاکستانۍ جرگه گۍ د غړو نومونه اعلان کړي .