استراليايي لومړى وزير کيون روډ په کابل کې له ولسمشر کرزي سره پر روانو چارو خبرې وکړي

ښاغلي روډ ټينگار وکړ چې هېواد يې د ترهگرۍ په ضد جگړه کې له نورو هېوادونو سره ټينگ ولاړ دى، خو ويې ويل چې په دې لار کې لاهم ننگونې شته دي.

استراليايي لومړى وزير افغانستان ته په دغۀ نااعلان شوي سفر کې لومړى په ارزگان کې کوز شو. هلته يې له خپلو سرتېرو سره چې د عيسوي کريسميس اختر په درشل کې دي سره وکتل او بيا کابل ته والوت.

زموږ سرتېري په ارزگان مېشت دي. ما وکولاى شول چې هغوى وگورم او د استراليا د خلکو مننه تر دوى ور ورسوم. دوى يوې سخته او ننگوونکې دنده هلته پر مخ بيايي استراليايي لومړى وزير کيون روډ

له ولسمشر کرزي سره يې په گډ خبري کنفرانس کې وويل چې له افغانستان سره به د بيارغاونې په برخه کې ١١٠ ميليونه ډالره مرسته وکړي.

استراليا په تېرو شپږو کلونو کې له وروستۍ ژمنې پرته ١٥٠ ميليونه ډالر مرسته کړې.

ښاغلي روډ وويل هېواد به يې له افغانستان سره خپلې مرستې روانې وساتي.
دۀ وويل: '' زموږ سرتېري په ارزگان مېشت دي. ما وکولاى شول چې هغوى وگورم او د استراليا د خلکو مننه تر دوى ور ورسوم. دوى يوې سخته او ننگوونکې دنده هلته پر مخ بيايي. دوى هڅه کوي چې له افغان ځواکونو سره په همغږۍ کې د امنيت او ټيکاو په ساتنه کې برخه واخلي او افغانانو ته هوسايي راوړي.''

د بيارغاونې له مرستو سربېره، استراليا په افغانستان کې ٩٠٠ سرتېري هم لري چې د ناټو پر مشرۍ د ايساف تر چتر لاندې مېشت دي.

ولسمشر کرزي هم په خپل وار د استراليا له مرستو څخه مننه وکړه او له هغۀ هېواد سره يې د افغانستان د ښو اړيکو يادونه وکړه.

استراليا په تېرو څو کلونو کې په لوېديځ کې د افغانستان د نوي سياسي بهير يو له وتلو هېوادونو څخه ده.

ښاغلى روډ له عراقه افغانستان ته په ناڅاپي سفر رارسېدلى و.
دا د لومړي وزير کيون روډ لومړنى سفر دى چې افغانستان ته يې کوي. دى تېره مياشت د لومړي وزير په توگه وټاکل شو.