نعمت الله کرياب له اسد اباد څخه

	کوړنگل د کونړ تر ټولو نارامه او خورا غرنۍ سيمه ده

دا سيمه په و روستيو کې د پرلپسې جگړو لامله تر نورو زياته زيانمنه شوې ده. د کونړ په تر ټولو غرنۍ سيمه کې د سړک جوړولو ته هم د امريکايي ځواکونو لخوا د هغو هڅو د يوې برخې په توگه کتل کېږي چې د ځايي خلکو زړونه خپل کړي.

د سړک د رغولو د پيل په يوه غونډه کې ځايي چارواکو وويل د دغې پروژې لگښت به چې شاوخوا دوه نيم ميليونه ډالر اټکل شوى د امريکايي پوځ لخوا ورکول کېږي، چې په کونړ کې د ولايتي بيارغاونې ډلې په چوکاټ کې مېشت دي.

د دغۀ لس کيلومتره اوږد سړک په پخولو سره به لس کلي له ولايتي مرکز، اسد اباد، سره ونښلي او د ساعتونو مزل به څو برابره لنډ شي.

د چارواکو په خبره، د سړک جوړونې په کار کې به په سلگونو سيمه ييز خلک په کار ولگېږي چې د ورځې د پنځۀ نيمو ډالرو په بدل کې به کار کوي.

چارواکي وايي په جگړه ځپلو سيمو کې د خلکو په کار بوختول د ناامنۍ او بېوزلۍ په راکمولو کې ښه مرسته کولى شي. د دغۀ سړک جوړونه ټاکل شوې په څۀ کم يو کال کې بشپړه شي.

دا سړک زموږ درا تلونکو نسلونو لپاره لويه ګټه ده. د دې سړک په جوړولو کې موږ او بهرنيو دواړو ته فايده ده ځکه پر امريکايانو به نور بمونه نه الوځي او زموږ د دوه درې ساعتونو مزل به يو ساعت ته را لنډ شي يو ځايي اوسېدونکى، عزيزالله

دکوړنګل يو اوسېدونکى عزيز وايي د سړک پخول دوى او بهرنيو ځواکونو دواړو ته ارزښت لري. عزيز واېې که جګړو ورته تاوان ور واړاوه، خو د سيمې د بيارغاونې لپاره يې د چارواکو پام هم ور واړاوۀ.

دى وايي: ''دا سړک زموږ درا تلونکو نسلونو لپاره لويه ګټه ده. د دې سړک په جوړولو کې موږ او بهرنيو دواړو ته فايده ده ځکه پر امريکايانو به نور بمونه نه الوځي او زموږ د دوه درې ساعتونو مزل به يو ساعت ته را لنډ شي.''

دکونړ والي فضل الله وحيدي چي ددغه سرک پرا نيستې ته ورغلی و د ځينو نورو کارونو دجوړيدو ژمنې يې هم وکړې، خو شرط يې داو چې سيمه ييز خلک ورسره دامنيت په راوستو کې مرسته وکړي.