د هلمند اوسيدونکي وايي په پوځي عملياتو کې دوى وژل کيږي ناټو پر طالبانو پړه اچوري چې له ملکي وگړو د ډال کار اخلي

دغه خلک چې تر ډيره د ناوې او ګرمسېر اوسديونکي دي ادعا کوي چې پنځه ورځې مخکې ايتلافي ځواکونو د ملي اردو په ملگرتيا په ګرمسېر ولسوالۍ کې د عملياتو پر مهال د طالبانو پر ځاى ولسي وګړي وژلي دي .

د امريکا په مشرۍ ايتلافي ځواکونو تيره اوونۍ ويلي وو چې دوى په ګرمسېر ولسوالۍ کې ٢٣ تنه طالبان وژلي او ١١ يې ژوندي نيولي دي.

خو د ګرمسېر ولسوالۍ قومي مشران ادعا کوي چې په دې عملياتو کې ١٨ تنه ملکي وګړي او دوه تنه طالبان وژل شوي وو .

د ملکي وګړو د وژنې په اړه تل کورنيو او بهرنيوځواکونو ويلي چې طالب جنګيالي د ملکي وګړو له کورونو پر دوى ډزې کوي .

په لښکرگاه کې ټول شوي د ګرمسېر ولسوالۍ قومي مشران دا مني چې وسلوال طالبان يې په زوره په كورونو ور ننوځي خو دوى وايي چې د طالبانو پر وړاندې هېڅ نه شي کولاى.

د هلمندوالي اسدالله وفا رسنيو ته ويلي چې په ګرمسېر کې د عملياتو پر مهال القاعده او بهرني طالبان پټ شوي وو په همدې دليل عمليات پر ځاى وو، خو دولسي وګړيو پر مرګ ژوبلې خواشينى دى.

والي زياته کړې چې طالبان د ولسي وګړيو له کورونو د ډال په توګه کار اخلي .