د ملا محمد عمر په مشرۍ ٦ کاله مخکې د طالبانو د حکومت له نړېدو وروسته دا لومړى ځل دى چې دوى له کابل سره خبرو ته چمتووالى ښيي

خو دا چې د خبرو تر پيل وړاندې دواړه غاړې له کومو ننگونو سره مخامخ دي او څومره ستونزې په لار کې شته ، د دغو پوښتنو د ځواب هڅه ايمل پسرلي په دې شننه کې کړې ده:

د وسله والو طالبانو له لورې د خبرو وړانديز ته مثبت ځواب نوې پوښتنې پورته کړي دي . تر اوسه پورې تل افغان حکومت د خبرو وړانديز کاوۀ او وسله والو طالبانو پرې غوږ نه گراوۀ .

اوس چې ظاهرآ ځواب مثبت دى پوښتنې ښايي دا وي چې کابل به د وسله والو طالبانو شرايط ومني که نه او وسله وال طالبان به په خپل دريځ کې بدلون ته غاړه کيږدي که نه . کابل ته به گرانه وي چې په هيواد دننه هغه کسان چې په حکومت کې هم مهمې دندې لري ، قانع کړي چې د وسله والو طالبانو ځينې غوښتنې ومني.

د ولسمشر کرزي نړيوال ملاتړي به هم په اسانه لږ تر لږه د ځينو طالبانو سره خبرو ته زړۀ نه ښه کوي . د خبرو لپاره تر کابل ښايي وسله وال طالبان له ډيرو ستونزو سره نه وي مخامخ .

د کوريايي يرغملو په باب د خبرو پايلو ته په پام، طالبان ښايي دا ځلې په لويه کچه خبرو اترو ته هڅېدلي وي. هلته دوى وتوانيدل چې له خپلې واکمنۍ وروسته په لومړي ځل خبري کنفرانسونه ورکړي او له يوۀ بهرني هيواد سره د خبرو ميز ته کېني او خپلې غوښتنې تر يوۀ ځايه پرې ومني

په وسله والو طالبانو کې دننه که څوک د خبرو مخالف وي هغوى ښايي په دې منطق قانع شي چې دغه ډول خبرې د دوى درېځ پياوړي کوي او د سياست د ډگر په سيالانو کې يې دروي .

د وسله والو طالبانو له خوا خبرو ته اوس سر خوځول هم ځينې پوښتنې پيدا کوي . ايا پوځي فشارونه دي ، د ولس له ممکنه غبرگونه ويره ده ، له خپلو ملاتړو اشارې دي او که د کوريايي يرغملو په باب د خبرو هغه پايله ده چې دوى پرې خوښ و .

وسله وال طالبان هلته وتوانيدل چې له خپلې واکمنۍ وروسته په لومړي ځل خبري کنفرانسونه ورکړي او له يوۀ بهرني هيواد سره د خبرو ميز ته کېني او خپلې غوښتنې تر يوۀ ځايه پرې ومني .

که خبره هر څه وي کابل او وسله وال طالبان دواړه ورو ورو په دې پوهيږي چې د مسالې يوازينى حل د ټوپک خولۀ نۀ بلکې د خبرو ميز دى . خو تر هغو چې خبره ميز ته رسيږي ښايي دواړه غاړې له ډيرو ننگونو، ستونزو او کړاونو سره مخامخ شي.

وسله وال طالبان به افغان اساسي قانون ومني که نه، د دوى د مشرتابۀ مساله چې نړيوال يې ترهگر بولي او په حکومت کې دوى ته ونډه هغه ننگونې او ستونزې دي چې دواړه غاړې به ورسره مخامخيږي . دا چې کومه غاړه له نرمښته کار اخلي هغه څه دي چې وخت به يې راښيي.