د افغانستان د اپيمو سږنى حاصل ٨٢٠٠ ټنه گڼل شوى چې د پروسږ کال په پرتله ٢١٠٠ ټنه ډېروالى ښيي

د افغانستان د اپيمو سږنى حاصل ٨٢٠٠ ټنه گڼل شوى چې د پروسږ کال په پرتله ٢١٠٠ ټنه ډېروالى ښيي. اوس د نړۍ په سلو کې ٩٣ ترياک له افغانستان نه راځي. ملگري ملتونه او افغان حکومت دواړه وايي په هغو سيمو کې چې حکومت واکمن نه دى، د کوکنار کر پکې تر ټولو ډېر شوى دى.

خو ولسمشر حامد کرزى دا نه مني چې ستونزه دې يوازې د ده د ادارې کمزوري وي. هغه نړيوالو لوبغاړو ته د پړې گوته نيسي او وايي چې خپلو کې سره همغږۍ نلري، او قاچاق کونکي "بهرنيان دي، نه افغانان".

يوۀ جگپوړي امريکايي چارواکي په کابل کې د خبرو پرمهال يو ځل بيا د کوکنار پر کروندو د وچونکو کمياوي موادو شيندول د اپيمو د توليد د مخنيوي تر ټولو اغيزمنه لار وبلله.

خوډېرى يې حل په نورو لارو کې ويني، لکه بزگرو لپاره د روا گټې د لارې په هوارولو، د قانون په واکمنولو ، په اداره کې د فساد په مخنيوي او داسې نورو کې.

تاسې څه وايئ چې له دې مسلې سره بايد څه ډول چلند وشي؟ د حل لارې يې کومې دي؟

په افغانستان د کوکنارو د مخنيوي لارې، په ستاسې غږ کې.

محمد خالد نورزى، ارزگان – افغانستان
د افغانستان خلک په دې نيت کوکنار نه کري چې لويديځوالو ته ستونزې وزېږوي، دوى يوازې د ژوندي پاتې کېدو لپاره پر خپلو ځمکو کوکنار کري. که لويديځوال د حکومت پر ځاى مخامخ له بزگرو سره مرسته وکړي، بيا زه هېڅ دليل نه وينم چې څوک دې کوکنار وکري. په ارزگان کې دوه کاله مخکې بزگرو کوکنار ونه کرل، خو هېڅ چا يې اقتصادي ستونزو ته پام ونه کړ. له مجبوريت څخه يې بېرته د کوکنارو کر ته مخه کړه.

نورالله نيازبين، پېښور – پاکستان
دا غريب خلک څه وکړي. دا يې د گټې يوازينۍ لار ده. يو څو کاله خو يې ورته پريږدئ. په وطن کې لوستي خلک اوزگار دي، بزگرو ته به څوک کار پيدا کړي؟ زه خپله يو انجنير يم، خو په افغانستان کې د بيکارۍ له امله اوس په پاکستان کې کار کوم.

هيبت الله زرمتى، ممبيي – هند
په افغانستان کې نړيوالو ځواکونو، په تېره بريتانوي ځواکونو ته ډېرې پوښتنې متوجې دي. دوى په جنوب کې د کوکنارو د کر په مخنيوي کې پاتې راغلي. د کوکنارو کروندې هر چېرې ليدل کيږي، له ځمکې، له هوا، له لرې او نژدې ، له هرځاى څخه. په دغو پنځو کلونو کې دوى په افغانستان کې د نشه يي توکو مخه ونه شو نيولى، د طالبانو مخه به څنگه ونيسي؟