تېر کال له دوی سره د ښځو پر وړاندې د تاوتریخوالي څه د پاسه ۴۰۰ پېښې ثبت شوې وې خو سږ کال دغه شمېره څه باندې ۳۰۰ ته راټیټه شوې ده.
د افغانستان په سوېلي ولایت کندهار کې د تېر لمریز کال په پرتله سږ کال د ښځو پر وړاندې د تاوتریخوالي په کچه کې کموالی راغلی دی.
د کندهار د بشري حقونو خپلواک کمیسیون وايي، تېر کال له دوی سره د ښځو پر وړاندې د تاوتریخوالي څه د پاسه ۴۰۰ پېښې ثبت شوې وې خو سږ کال دغه شمېره څه باندې ۳۰۰ ته راټیټه شوې ده.
د دغه کمیسیون په وینا د ښځو د ځان وژنو په پېښو کې هم د تېر لمریز کال په پرتله کموالی راغلی، خو لاملونه یې څه دي؟
په سوېلي ولایت کندهار کې د افغانستان د بشري حقونو د سیمه ییز دفتر چارواکي وايي، سږ کال په دغه ولایت کې د ښځو پر وړاندې د تاوتریخوالي پېښې د تېر لمریز کال په پرتله کمې شوي دي.
د کندهار د بشري حقونو د دفتر د ښځو د ودې او پرمختیا د څانګې مشره مرسل احمدزۍ وايي، تېر کال له دوی سره د ښځو پر وړاندې د تاوتریخوالي ۴۴۰ پېښې ثبت شوې وې خو سږ کال بیا دغه شمېره ۳۷۷ پېښو ته راټیټه شوې ده.
د اغلې احمدزۍ په وینا په دغه ولایت کې د ښځو د ځان وژنو په پېښو کې هم د تېر لمریز کال په پرتله کموالی راغلی دی.
د ښځو د ځان وژنو او د هغوی پر وړاندې د تاوتریخوالي پېښو د کچې د کمېدو لاملونه څه دي؟
د کندهار د بشري حقونو د خپلواک کمیسیون د سیمه ییز دفتر مشر قادر نورزی وايي، د دغه ولایت په یو شمېر سیمو کې د دولت حاکمیت ټینګ شوی او خلکو ته دا زمینه برابره شوې چې د بشري حقونو کمیسیون او دولت ته مراجعه وکړي.
خو ښاغلی نورزی وايي، په دې برخه کې لا ډېرې ستونزې شته او زیاتوي چې دوی د کندهار ولایت ټولو سیمو ته لاسرسی نه لري او هڅه کوي چې د حکومت په مرسته لا ډېرو سیمو ته لاسرسی پیدا کړي.
دا په داسې حال کې ده چې دوه ورځې وړاندې د لوېدیځ ولایت هرات سیمه ییزو چارواکو هم ویلي وو چې په دغه ولایت کې د ښځو پر وړاندې د تاوتریخوالي کچه راټیټه شوې ده.
هغوی یې لاملونه د ښځو د پوهاوي د کچې لوړېدل په ګوته کوي.
