د پاکستاني پوځ مشر جنرال اشفاق کياني د افغان حکومت په مشرۍ په افغانستان کې د سولې له بهيره ملاتړ کړى دی.
ده دغه څرګندونې په راولپنډۍ کې د افغانستان د دفاع له وزير جنرال بسم الله محمدي سره د کتنې پرمهال کړې دي.
په اسلام اباد کې د بي بي سي خبریال طاهر خان وايي، جنرال کياني د دواړو هېوادونو ترمنځ د ډېورېنډ پر کرښه د امنيت ټينګولو په برخه کې هم افغان لوري ته ډاډ ورکړی دی.
د ډاډ او همکارۍ دغه څرګندونې په داسې وخت کې کېږي چې افغان مشران د ترهګرۍ پر وړاندې جگړه کې د پاکستان له نه همکاري شکايت کوي.
پاکستان بيا په خپله ځان د ترهګرۍ قرباني بولي.
بسم الله محمدي پاکستان ته د سفر پر لومړۍ ورځ د پاکستاني پوځ په یوه مرکز کې د پوځ له مشر جنرال اشفاق پروېز کیاني سره پر دفاعي همکارۍ خبرې وکړې.
د خبر د رسنیو برخې ویلي، چې له دغه افغان وزیر سره په پلاوي کې نور جګپوړي پوځي افسران شامل و، چې دواړو غاړو د پاکستاني پوځ له لوري د افغان ملي اردو د روزنې په اړه لومړنۍ خبرې وکړې.
پاکستان څو ځلې افغان چارواکو ته د افغان پوځيانو د روزنې وړاندیز کړی، خو تر اوسه افغانستان مثبت ځواب نه دی ورته ویلی.
د پاکستان پوځ یوه اعلامیه کې ویلي، چې دواړو غاړو په سرحدي سیمه کې د امنیت د ټینګښت په اړه خبرې وکړې.
بسم الله محمدي له پاکستاني ولسمشر اصف علي زرداري سره په خبرو کې د ترهګرۍ پرضد پر دوو اړخیزو همکاریو ټینګار وکړ.
