دا مهال په افغانستان کې شاوخوا ۶۶ زره امریکايي سرتېري مېشت دي.
د امریکا "نیویارک ټایمز" ورځپاڼې ویلي، چې امریکايي چارواکي تر ۲۰۱۴ کال وروسته په افغانستان کې د پاتې کېدونکو امریکايي پوځيانو پر شمېر غږېږي.
خو "وال سټریټ ژورنال" بیا پخپل یوه راپور کې ویلي، چې امریکا غواړي په افغانستان کې تر ۲۰۱۴ کال وروسته لس زره پوځيان پرېږدي.
دغه راپورونه ددې څرګندويي کوي، چې تر ۲۰۱۴ کال وروسته د امنیتي پروګرام جوړول د اوباما د ادارې له لومړیتوبونو څخه دي.
نیویارک ټایمز ورځپانې ویلي، امریکا لس زره او د ناټو د نورو غړو هېوادونو څو زره نور پوځيان به په افغانستان کې پاتې شي.
وال سټریټ ژورنال ویلي، چې په افغانستان کې د امریکايي او نړیوالو ځواکونو قومندان جنرال جان الن په نارسمي ډول ددې غوښتنه کړې، چې له شپږو تر ۱۵ زرو پورې پوځيان په افغانستان کې پاتې شي.
خو د افغان دولت غوښتنه داده، چې د پاتې کېدونکو بهرنیو پوځيانو د دندې او فعالیت څرنګوالی په ډاګه شي، او که چېرې کوم جرم کوي، باید په افغان محکمو کې محاکمه شي.
خو امریکا له عراقه تر وتلو وړاندې له دغه هېواد سره پر دې موضوع مخالفت وښود، همدا وو، چې له عراقه یې خپل ټول پوځيان وایستل.
دا مهال په افغانستان کې شاوخوا ۶۶ زره امریکايي سرتېري مېشت دي.
