د کابل دوو بریدونو کې یو ولسي وګړی او د دفاع وزارت دوه څارنوالان وژل شوي
د عکس سرچینه، Hamdullah Arbab facebook
د دفاع وزارت مرستیال شاه محمود میاخېل وايي، ناپېژاندو وسله والو کابل ښار کې د دفاع وزارت دوه څارنوالان وژلي دي.
د کابل پولیسو ویاند فردوس فرامرز هم ویلي، پر دغو څارنوالانو د یکشنبې په ګهیځ د کابل ښار شپاړسمې حوزې اړوند ټانک چکري سیمه کې برید شوی.
تر اوسه ددغه برید مسئولیت چا نه دی منلی.
په ورته وخت کې د معلوماتو د لاسرسي کمېسیون د کمېشنر او انځورګر حمدالله ارباب پر موټر هم چسپکي بم نښلول شوی چې نوموړی روغ رمټ ترې وتلی، خو ښاغلي اربای ویلي چې چلوونکی یې د ټپونو له کبله مړ شوی.
ښاغلي ارباب پر فېسبوک د خپل موټر انځورونه خپاره کړي چې شتنۍ برخه یې بم خرابه کړې ده.
د دې چاودنې مسئولیت هم چا نه دی منلی.
معلوماتو د لاسرسي کمېسیون په یوه خبرپاڼه کې دا برید غندلی او له طالبانو او افغان دولت یې غوښتي چې د سولې خبرې چټکې کړې او د خلکو د وژنې مخه ونیول شي.
د عکس سرچینه، Hamdullah Arbab
که څه هم په وروستیو کې کابل ښار کې لوی بریدونه نه دي شوي، غلا غدۍ او د چسپکي بمونو بریدونه لاهم شته.
د دفاع وزارت مرستیال شاه محمود میاخېل وايي، د دولت مخالفان کابو هره ورځ د چسپکي بمونو بریدونه کوي.
د کابل ولایت ولسوالیو کې تر ډېره طالبان له افغان امنیتي ځواکونو سره په جګړه بوخت دي.
دا ناامنۍ د کابل د پولیسو د مشر د بدلېدو لامل شوې دي.
کابل ښار کې د ناامنیو دا تازه پېښې داسې مهال شوې، چې د قطر دوحه کې د افغان دولت او طالبانو ترمنځ د سولې بحثونه روان دي، خو تر اوسه یې غونډ، او مذاکراتو چندان نتیجه نه ده ورکړې.
