کابل کې چاودنې اووه کسان وژلي، مسوولیت یې داعش منلی

په کابل کې د طالبانو حکومت ځايي چارواکي وايي، په دشت برچي سیمه کې یوې چاودنې اووه کسان وژلي او شل نور ټپیان دي.

په کابل کې د طالبانو امنیې قومندان ویاند خالد ځدراڼ وايي، چاودنه د سپرلۍ پر یوه کاسټر ډول موټر شوې ده.

"د کابل ښار د دشتې برچې په سیمه کې د ملکي خلکو د سورلۍ په یوه کاسټر موټر کې چاودنه شوې چې متأسفانه زموږ ۷ تنه هېوادوال په شهادت رسیدلي او ۲۰ نور ټپیان دي."

د دغه برید مسوولیت اسلامي دولت (داعش) ډلې منلی دی.

اعماق ویبپاڼې، چې د داعش په ګټه نشرات کوي، په دې چاودنه کې د دې ډلې لاس لرل تایید کړي دي.

د طالبانو امینې قومندانۍ په دې اړه نور مالومات نه دي ورکړي خو وايي "ځواکونه یې سیمې ته رسېدلي دي."

د چاودنې د څرنګوالي په اړه ډېر جزئيات نه دي خپاره شوي.

په دشت برچي سیمه کې تر ډېره هزاره توکمي اوسېږي.

هممهاله رپوټونه وايي، د بدحشان په جرم ولسوالۍ کې هم د یوې سرګولولې د چاودېدو له امله هم یو کس وژل شوی او دوه نور ټپیان دي.

ټپیان دواړه ماشومان دي. رپوټونه وايي، دغه پېښه د ماشومانو د لوبو پرمهال رامنځ ته شوې ده.

غبرګونونه

کابل کې د ملکي خلکو په موټر دغه برید په پراخه کچه غندل شوی دی.

پخواني افغان ولسمشر حامد کرزي د اېکس یا پخواني ټویټر یوه پیغام کې لیکلي،‌ "دغه ترهګریزه کړنه، بشر ضد جنایت او له ټولو انساني او اسلامي ارزښتونو سره ټکر کې" ګڼي.

د افغانستان لپاره د ملګرو ملتونو ځانګړي رپورټر ریچارډ بېنېټ بیا دې ته په اشارې چې دا په تېره یوه میاشت کې پر هزاره توکمو دریم برید دی، د دې پېښې د عاملینو پېژندلو او ورسره حساب لپاره د بشپړې او شفافې څېړنې غوښتنه کړې ده.

شاوخوا دوه اوونۍ وړاندې د کابل په همدې ناحیه کې په یوه ورزشي کلب کې چاودنه شوې وه.‌

هغې پېښه کې د ۴ کسانو د وژل کېدو او ۹ نورو د ټپي کېدو خبر ورکړ شوی و.

تر هغې ورمخکې (اکتوبر ۱۳مه) د بغلان ولایت د مرکز پلخمري په امام زمان جومات کې چاودنه شوې وه چې د ځايي طالب چارواکو په وینا ۷ کسان پکې وژل شوي او ۱۵ نور ټپي شوي وو.