लुम्बिनीमा केही चर्चित उम्मेदवारको पनि जमानत जफत, माधव नेपाल, बुटवल
प्रतिनिधि सभाको निर्वाचनमा लुम्बिनी प्रदेशका केही चर्चित उम्मेदवारहरूको जमानत जफत भएको छ।
यसअघिका निर्वाचनमा एकीकृत समाजवादी पार्टीबाट दाङ-१ मा निर्वाचित पूर्वमन्त्री मेटमणि चौधरीले यो निर्वाचनमा जमानत जोगाउन पनि सकेनन्। सोही क्षेत्रबाट नेपाली कम्युनिस्ट पार्टी (नेकपा) बाट चुनावमा उठेका चौधरीले यस पटक ४ हजार ९६५ मत मात्र प्राप्त गरेका छन्। जबकि यसअघिको निर्वाचनमा उनले २६ हजार ५७६ मत प्राप्त गरेका थिए।
पाल्पा-२ बाट चुनाव लडेका सोमप्रसाद पाण्डेयको पनि जमानत जफत भएको छ। पूर्वमन्त्रीसमेत रहेका पाण्डेय नेकपाबाट उम्मेदवार बनेका थिए। यस पटक उनले ५ हजार २८८ मत मात्र प्राप्त गरेका छन्।
रुपन्देही-२ बाट चुनाव लडेका पूर्व सांसद तथा तिलोत्तमा नगरपालिकाका पूर्वमेयर वासुदेव घिमिरेले पनि यसपटक नराम्रोसँग हार बेहोरेका छन्। यसअघिको निर्वाचनमा रुपन्देही-५ बाट ३६ हजार ८२२ मतले विजय भएका घिमिरेले यस पटक निर्वाचन क्षेत्र परिवर्तन गरेका थिए। नेकपा एमालेबाट रुपन्देही-३ मा उठेका घिमिरेले यस पटक ८ हजार २७५ मत पाएका छन्। जुन मतले उनको जमानत जोगिँदैन।
यस्तै रुपन्देही-४ बाट जनता समाजवादी पार्टीको तर्फबाट उम्मेदवार बनेका पूर्व मन्त्री सर्वेन्द्रनाथ शुक्लले पनि यस पटक जमानत जोगाउन सकेनन्। यसअघिको निर्वाचनमा सोही क्षेत्रबाट चुनाव लडेका शुक्लले २८ हजार मत ल्याएर विजय भएका थिए। तर यसपटक भने उनले ३ हजार ४१० मत मात्र ल्याएका छन्।
नवलपरासी पश्चिम-२ बाट उम्मेदवारी दिएका पूर्व प्रहरी प्रमुख एवं पूर्व सांसद ध्रुवबहादुर प्रधानको पनि यस पटक जमानत जफत भएको छ। गएको चुनावमा राष्ट्रिय प्रजातन्त्र पार्टीको प्रतिनिधित्व गर्दै ३४ हजार ७६४ मतले विजयी भएका प्रधानले यस पटक ४ हजार ६९१ मत मात्र प्राप्त गरेका छन्।
