Жеңиш күнү: нацисттик Германиянын акыркы күндөрү сүрөттөрдө

Soviet soldiers on the streets of Berlin 1945 — Сүрөттүн түшүндүрмөсү, Эки жумага созулган кандуу кармаштан кийин Берлин багынган

8 май 2020

Төрт жылга созулган кандуу салгылашуулардан кийин Советтер Союзунун аскерлери 1945-жылы 16-апрелде Берлин шаарын басып алуу операциясын баштаган.

Нацисстик Германия СССРге 1941-жылы июнь айында кол салып, миллиондогон аскерлер жана жайкын тургундар мүрт кеткен. Бирок советтик аскерлер Берлинге жетип барганда, Гитлердин армиясы алсырап бүткөн эле. Туш тарапка чачыраган нацисттик Германиянын аскерлери чыгыш жана түштүк тараптан операциясын баштаган советтик армиянын чабуулуна туруштук бере алган эмес.

Германиянын баш калаасы Берлинди 1.5 миллион советтик аскер курчоого алган. Бул Экинчи дүйнөлүк согуштун Европадагы акыркы ири аскердик операция болуп калды.

Soviet planes over Berlin 1945 — Сүрөттүн түшүндүрмөсү, Совет аскерлери Берлинди курчоого алып, абадан жана жөө аскерлери менен операциясын баштаган

Civilians fleeing Soviet forces in Berlin 1945 — Сүрөттүн түшүндүрмөсү, Берлин шаарында жашаган айрым жайкын тургундар калаадан чыгып кетүүгө аракеттенген

Адольф Гитлер Берлинден чыгып кетүүдөн баш тартып, акыркы күндөрүн шаардын борборундагы "Фюрербункер" аттуу бункерде жашаган. Гитлер эл алдына акыркы жолу 1945-жылы 20-апрелде, туулган күнүндө (56 жашка толгон) чыккан. Ал шаарды коргоп жаткандарга медаль ыйгарган болчу.

Ошол күнү Советтер Союзунун армиясы Берлиндин борборун артиллериялык аткылоого алган. Шааар 23-апрелде толугу менен курчоого алынган.

Adolf Hitler congratulates a 12-year-old German soldier — Сүрөттүн түшүндүрмөсү, Нацисттик бийлик аскер катарында карыяларды жана жаш балдарды шаарды коргоо үчүн колдонгон. Бул сүрөттө Адольф Гитлер жаш балага медаль ыйгарып жатат

Нацисттик күчтөр Советтер Союзунун аскерлерин токтото алган эмес. 1945-жылы 30-апрелде Гитлер өзүн атып өлтүргөн. Бир күн мурун ал Эва Браунга үйлөнгөн эле. Алардын сөөгү бункерге жакын жерде өрттөлгөн.

Ошондон көп өтпөй советтик күчтөрү Нацисттик Германиянын парламенти, Гитлердин бийлигинин символу "Рейхстаг" имаратын колго алып, аскерлердин бири СССРдин туусун илген. Бул тарыхтагы эң белгилүү сүрөттөрдүн бири болуп калды.

A Soviet soldier pictured hoisting a flag over the Reichstag in 1945 — Сүрөттүн түшүндүрмөсү, "Рейхстаг" имаратына СССРдин туусун илген аскер

Берлин шаары 2-майда расмий түрдө багынган, бирок Европадагы салгылашуулар 8-майга чейин уланды.

Skip Эң көп окулгандар and continue reading

Эң көп окулгандар

End of Эң көп окулгандар

Аба соккулар жана согуштан улам Берлин толугу менен талкаланган. Совет аскерлери жергиликтүү тургундарга нан жана башка керектүү азык-түлүктөрдү тараткан. Бирок айрымдары жайкын тургундарды тоноп, зомбулукка барганы дагы айтылып келет.

A plane shot down near the Reichstag in Berlin 1945 — Сүрөттүн түшүндүрмөсү, Берлин шаары толугу менен талкаланган

Soviet soldiers hand out bread to civilians in Berlin 1945 — Сүрөттүн түшүндүрмөсү, Совет аскерлери жайкын тургундарга нан жана тамак-аш тараткан

Берлинди Антигитлерлик коалицияга кирген күчтөр көзөмөлүнө алган.

Жергиликтүү тургундар урандыларды тазалап, бир нече айдан кийин АКШ, Британия жана СССРдин лидерлери Берлинден жыйырма чыкырым аралыктагы Потсдам шаарында чогулуп, тынчтык келишимин талкуулашкан.