Канатына карабай жем болду. Сүлөсүндүн фламингого аңчылыгы…

Табиятты чагылдырган дүйнөлүк фотографтардын фото сынагы аяктады. “Фото мергендер” укмуш көз ирмемдерди тарткан экен. Биз алардын арасына Кыргызстанда тартылган айрым фотолорду да тиркеп койдук. Ал аркылуу табияттын кооздгун сиз да бир байкап, өзүңүз дагы салыштырып көрүңүз.

Танзанияда фламингону олжологон чөл сүлөсүнүнүн (каракал) сүрөтү Nature TTL Photographer of the Year 2022 конкурсунда биринчи орунду алды.

Фотограф Деннис Стогсдиллдин "Мышык жана анын олжосу" деп аталган сүрөтү жапайы жаратылыштын сүрөттөрү конкурсунда дүйнө боюнча 8 миң атаандашынын ичинен жарк этип жеңип чыкты.

"Бул чыныгы жапайы жаратылыш, - деди Nature TTL’дин негиздөөчүсү Уилл Николлс. - Каракал фламинголорду кууп жүрүп сууга чыланганына карабай жеңүүчү болуп чыкты. Күңүрт тарткан теребелден өтө айырмаланган ачык түстөр бул сүрөтткө чындап эле өзгөчө боек берип турат. Автордун бул ирмемди көрүп, тартканга үлгүрүп калганы укмуш болду. Бул сүрөт “Айбандардын жүрүм-туруму” категориясында да жеңүүчү болуп чыкты.

"Айбандардын жүрүм-туруму", 2-орун: Майкл Снедиктин "Чаңды көккө сапырган африка пили"

Баткакка оонагандан кийин бул африка пили Танзаниядагы Нгоронгоро кратеринде турган сафари-унаабызды көздөй бет алды.

Ал тумшугуна топурак толтуруп алып, тумшугун өйдө каратып күргүштөтө үйлөдү. Менин камерам тынымсыз тартуу режимине коюлган эле.

Толкунданткан бул ирмемди жинди болгон кишидей сүрөткө тарттым.

“Фотокапкан”, жеңүүчү: “Муз аюу”, Жеффри Рейно

Канадалык Юкондо жыл сайын уникалдуу көрүнүштөр болуп турат.

Аюулар жүндөрүн “тоңдуруу үчүн” карды тоголоктоп, абанын температурасы -30°С чейин түшкөнүнө карабай декабрь айына чейин ачык асман алдында жүрүшөт. Бул сүрөт кар бороонуна эки күн калганда дарыянын жээгинде орнотулган фотокапканга тартылган.

“Фотокапкан”, 2-орун: “Дүйнөнүн чокусу”, Саша Фонсека

Ак илбирс Индиядагы Ладакх тоо кыркасынын чокуларында олжо издеп жүрөт.

Бул мышыктын калың жүнү жана сапсагай таманы ак кар, көк музга карбай жылытат. Сүрөт санариптик фотокапкан-камерасына тартылган.

Мен үч жылдан бери Индиянын Гималай тоолоруна фотокапкандарды орнотуп келем.

"Пейзаждар", жеңүүчүсү: "Табияттын кайра соккусу", Бертус Ханеком

Түштүк Африканын кургакчыл Кару чөлкөмүндөгү таштанды талаасы. Кыйынчылыктарга моюн бербеген күн карам ажана чагылган.

"Пейзаждар", 2-орун: "Лава", Марек Бегальски

2021-жылдын март айында исландиялык Гелдингадалир шаарындагы Фаградальсфьялль жанар тоосу атыла баштаган. Мен бул сүрөттү 17-сентябрда тарттым - ал күнү лаванын агымы укмуштуудай болгон.

“Кыпындай дүйнө”, жеңүүчү: “Көпөлөктүн саякаты”, Тибор Литауски

Бул көпөлөктү жайында, кеч киргенде сүрөткө тартканга жетиштим.

Учууну байкоо үчүн диоддук фарасын колдондум. Көпөлөктү камеранын жарк этмеси менен жарык кылып, камерадагы мультиэкспозиция менен күүгүмдөттүм.

“Кыпындай дүйнө”, 2-орун: “Чаңчадагы селки”, Тим Крэбб

Британиядагы Маттерс Мур сейил багында сары гүлдүү өсүмдүктүн чаңчасы менен капталган Micropterix calthella көпөлөгү. Сүрөт фокус-стекингди колдонуу менен тартылган сүрөттөрдүн жыйындысы.

"Түнкү асман", жеңүүчү: "Австралиянын чокусу", Жослен Корну

Бул сүрөт Жаңы Түштүк Уэльс штатынын түштүгүндө жайгашкан Австралиянын эң бийик жери - Косцюшко тоосуна саякат учурунда тартылган.

Ал ошондой эле караңгы асмандан улам Саманчынын жолун тартуу үчүн эң жакшы жерлердин бири.

"Түнкү асман", 2-орун: "Таң каларлык”, Мауро Тронто

Бул кадр сыйкырдуу элементтердин жуурулушусу. Түнкүсүн укмуштуудай күндүн кулагын жараткан айдын жарыгы.

Анын үстүндө кооз түндүк чырактары жана Годафосс - Исландиядагы асердүү шаркыратма.

Бардык кубулуштар реалдуу жана бир убакта пайда болот.

"Суу астында", жеңүүчү: "Баткан күндүн шооласы", Энди Шмид

Батып бараткан күндүн фонунда майда балыктардын тобун кесип өткөн кызгылт скаттын сүрөтү Мальдив аралдарынын борбору Маледеги атактуу Tuna Factory сууга түшүү аянтынан тартылып алынган.

"Суу астында", 2-орун: "Икра", Талия Грейс

Чыгыш тиштүү эпигонустун эркеги балыктын уругун оозу менен ташып жүрөт. Ал икра жарылып чыкканга чейин бир ай сактайт.

"Шаардын жапайы жаратылышы", жеңүүчү: "Шаардык коён", Ян Пьеха

Германиянын Касселинин четиндеги бул жер күндүзү күнүмдүк иши менен алектенгендерге жык толот. Түнкүсүн кезек жаныбарларда.

"Шаардык жапайы жаратылыш", 2-орун: "Жаркырак коңуздардын мегаполиси", Жослен Корну

Австралиянын Хеленсбург шаарындагы кароосуз калган темир жол станциясы. Жаан-чачындуу түндөрү аны жарыктандырган жаркырак коңуздардын шаарына айланды.

Бул сүрөттү тартуу үчүн эски вокзалга жаан-чачындуу түндө барууга туура келди. Ошондо жаркыраган шаркыратма пайда болот.

Бул сүрөт тартылган күндүн эртеси туннелди суу каптап кеткен.

“Жапайы портреттер”, жеңүүчү: “Мен сени көрүп жатам”, Томаш Шпила

Чоң арстан сиздин көзүңүзгө тике караганда, сиз коопсуз унаада отурганыңызды дароо унутуп, жырткычты козгоп албоо үчүн инстинктивдүү түрдө машинанын ичине акырындык менен бекине байштайсыз.

Бактыга жараша, арстан бир туугандары менен бир нече мүнөт мурун кармалган жаш буйволду жалмап, "бош эмес".

“Жапайы портреттер”, 2-орун: "Жапайы жаратылыштын бир ирмеми", Мэтт Энгельманн

Мен бул түлкүнү ​​Швейцариянын Граубүнден аймагынан бир ай бою кылдаттык менен байкап, бул жер сүрөткө тартуу үчүн абдан ылайыктуу экенин түшүндүм. Сүрөт түлкүнү чочутуп албаш үчүн аралыктан кең бурчтуу объектив менен тартылган.

“16 жашка чейин”, жеңүүчү: “Көз караштар”, Ачинтья Мурти

Малабар тоту куштары укмуштуудай жандыктар. Аларды көбү көк канаттуу тоту куштар деп да аташат. Алар көбүнчө чоң топторго чогулушат. Мен бул сүрөттү Индиянын Карнатака штатында бул канаттуулар уя салган жеринен тартып алдым. Бул канаттуулар дүмүрдүн үстүнө чачылган күрүч дандары үчүн күрөшүп жатышат.

“16 жашка чейин”, 2-орун: “Чоң чомга”, Максимилиан Пачковски

Польшада мен жашаган Познань шаарынан анча алыс эмес жерде чомга [аны чоң арам өрдөк деп да аташат] жүргөн чоң көлмө бар. Бул көлмөдө алардын эң аз дегенде төрт түрү уялайт. Алар бул жерге балыкчылар көп келгендиктен, адамдардан чочубайт. Бул сүйкүмдүү чомга күн батып баратканда сүрөткө түшүү үчүн мага ар кандай позаларда туруп берди.

Кыргызстанда да мындай сүрөттөрдү тартууга болот

Кыргызстанда да жаратылышты мыкты тарткан фотографтар жок эмес. Нурсултан Аттокуров 3 жылдан бери тоолорго саякаттап, көк мелжиген тоолорду, тоо көлдөрүн, жайлоолорду, токой жана агын сууларды суктангыдай кылып сүрөткө тартып келет.

"Элден жакшы сын-пикир алган сүрөт – бул “Алёшканын үйү”. Дүйнө жүзүнө тарап кетти. Бул сүрөт Дубайда көргөзмөдө болду. Туризм департаментинин сайтында дагы ушул сүрөт турат. Аны көрүп Кыргызстанга эки немис кыз – фотографтар келип кетти. Бир сүрөт аркылуу Кыргызстанды канчалаган жерге таанытканга шарт түзүлдү", - деп айтып берген Аттокуров.

"Булут катты деп коюшат экен, булут каат-каат болуп катып калат экен. Илимий тилде лентикулярдык булут деп аталат. Күн батып бараткан учур эле. Ошол үчүрда: күн батып баратканда, булут катканда, ошол жерде фотоаппаратым менен болуп калганым, мага Кудайдан буйругандай болду", - дейт кыргызстандык сүрөтчү.

Би-Би-Синин жаңылыктарынан артта калбаш үчүн биздин социалдык баракчаларыбызга жазылыңыз: