Ọrụ ise dị n'ọdịnihu na etu ị ga-esi rite uru na ya

Ebe a na-arụ ọrụ na-agbanwe n'ike n'ike, ọrụ niile dị ugbua ga-efu.

Nnyocha ụlọọrụ World Economic Forum mere kwuru na e nwere ihe abụọ kpatara ya, mmepụta teknụzụ na mgbanwe green energy.

Nnukwu nchọpụta sayensị na teknụzụ ka a na-ekwu na ọ nwereike iweta nnukwu mgbanwe n'ebe a na-arụ ọrụ.

Ihe ọma dị na ya bụ na nchọpụta teknụzụ a ga-emebi ọrụ ụfọdụ ma mepụtakwa ụfọdụ ndị ọzọ.

Ndị na-eme nnyocha n'ụlọọrụ kwuru na ihe karịrị ọkara ọrụ dị ugbua ga-agbanwe n'ime afọ ise na-abịa.

Ya mere, ọ bụrụ na ị chọrọ iso na-ekwe oyoyoo n'ọrụ, ị kwesịrị ịmụta aka ọrụ ọhụrụ.

Akaọrụ kachasị.

Inwe akaọrụ teknụzụ bụ ihe dị mma ma ọ bụrụ na ị chọrọ inwe ohere inweta ọrụ.

Nke a apụtaghị na onye ọbụla ga-ama ihe gbasara teknụzụ.

Mana n'ọdịnihu, e kwenyere na ọrụ STEM ga-abụ ihe a chọrọ nke ukwuu.

STEM bụ aha e ji akọwa mmụta teknụzụ nke gụnyere sayensị, teknụzụ, ọrụ ịnjinịa na Maas.

Ọ bụrụ na ị na-eche ihe nwa gị ga-agụ na mahadum, lee asịsa gị ebe a: Maas, sayensị kọmputa, na sayensị.

Akaọrụ ọzọ bụ ichepụta ihe. Iji kwalite nke a, ọ dị mma ịgụ akwụkwọ iji mee nnyocha, chọpụta ihe ma mepụta ihe na-enweghị obi abụọ.

Ọ bụrụ na ị chọọ ime nke, ị ga-enye ụbụrụ ọzụzụ n'ihi na e nwere ihe ndị ọzọ ga-achọ i were uche gị.

Ọzọ bụ inye onwe gị ọzụzụ iji mee ka ị mara ọtụtụ ihe na etu e si eme ọtụtụ ihe.

Mkparịtaụka na inwe obi ọmịiko bụ akaọrụ dị mkpa n'ọrụ mmịihe nwa Bekee bụ artifical intelligence.

N'agbanyeghị mmepụta akụrụngwa ọrụ, ndị mmadụ ga-abara ibe ha uru. Ọ bụrụ na ị mara ka esi akparịtaụka, ege ntị na i nyere ndị mmadụ aka, ị ga-abara onwe gị uru dị iche.

Nchọpụta LinkedIn wepụtara n'afọ 2020, kwuru na ị maa etu e si akparịtaụka bụ akaọrụ a na-achọ achọ n'ebe a na-arụ ọrụ taa.

Dan Negroni ọkammụta n'ihe gbarasa ọrụ na mmekọ ndị nwere aka ọrụ kwuru na ọ dị mkpa ịmụta aka ọrụ mkparịtaụka

Teknụzụ ọhụrụ

Ọrụ nkanụụzụ mgbasaozi ga-abara gị uru n'ọdịnịihu dịka a na-emepụta artificial intelligence.

Ọrụ dị oke mkpa na ngalaba ọrụ bụ ịnjinịa, ịmụta mkparịtaụka n'etiti artificial intelligence nke ga-eme ka a chọpụta ihe ndị mmadụ chọrọ oge ọbụla na-egbughị oge.

Ọrụ ọzọ yitere AI gụnyere ethicists, nke a bụ onye ọrụ ya bụ ịhụ na a na-eme dịka usoro siri kwuo, ịnjinịa nchekwa na ndị na-emepụta ihe mmekọ n'etiti mmadụ na akụrụngwa ọrụ.

Ọ zọ bụ mgbakọ ọnụọgụ data na ozi sitere n'ụlọọrụ dịka Netflix na ndị otu ya.

A ga-enwe ọrụ maka ndị nchekwa cyber maka a ga-enwe ọtụtụ ozi kwesịrị nchekwa.

Ndị maara ihe gbasara mgbakọ, ndị na-atụle azụmahịa na ndị na-emepụta blockchain ga-adị mkpa.

Ọrụ Green

A ga-achọ ndị ọrụ akwụkwọ ndụ maka na ọ na-eto ngwa ngwa dịka akụkọ ụlọọrụ World Economic Forum wepụtara n'afọ 2023 maka ọrụ Ọdịnihu.

"N'ụwa niile, mgbanwe ndụ nwere ike ịmepụta ọrụ nde 30 na ike dị ọcha, arụmọrụ na teknụzụ dị ala site na 2030," ka akụkọ ahụ na-ekwu.

Ka ọ dị ugbu a, mba ndị nọ n'ohere imepụta ọrụ ọhụrụ green bụ mba ndị dị n'Ebe Ọdịda Anyanwụ na Japan, China ji nwayọọ nwayọọ na-agagota.

Ọrụ ndị a nwereike metụta azụmahịa, sayensị, ndọrọ ndọrọ ọchịchị maọbụ gburugburu ebe obibi, n'ime ngalaba ndị na-arụ ọrụ na mmepe, ichekwa ụdị ndị dị ize ndụ, ndụmọdụ azụmahịa ma ọ bụ, dịka ọmụmaatụ, omume iwu na mgbanwe na iwu nchekwa gburugburu ebe obibi.

A ga-enwekwa mkpa gabiga ókè maka ndị nhazi obodo, ndị na-ese ụkpụrụ ụlọ, ndị na-emepụta ihe na ndị na-emepụta ụlọ mara mma.

Ndị ọrụ ahụike

Ọnụọgụgụ ndị bi n'ụwa na-aka nká, atụmanya ndụ na-amụbakwa. A ga-achọ ndị nlekọta na ọgwụgwọ karịa.

Yabụ, ndị ọkachamara ahụike ka a ga-achọrịrị nke ukwuu n'ọdịnihu. Karịsịa ga-abụ ndị ọrụ ahụike na-enye onye ọrịa ọ bụghị naanị ọgwụ, kamakwa nkwado omume.

Ndị dọkịta na ndị ọkachamara ahụike ga-amụtarịrị ma na-amụta mgbanwe na usoro nyocha na ọgwụgwọ ọhụrụ. Ọgụgụ isi AI ga-enyekwa aka.

A ga-enwekwa ọrụ maka ndị ọkachamara n'akparamàgwà mmadụ na ndị ndụmọdụ dị iche iche nke mmepe onwe onye ma ọ bụ ndị nkuzi nke omume ime mmụọ.

Ọrụ aka

Ndị ọkachamara na-arụ ọrụ aka, dị ka igwe igwe, ndị na-arụzi ọrụ, ndị ọkụ eletrik ma ọ bụ ndị na-arụ ụlọ, ka a ga-achọ n'afọ ndị na-abịa.

N'ebe ọ dị mkpa ịrụ obere ọrụ na nke ziri ezi n'ọnọdụ dị iche iche, mmadụ ka ga-abụ nke a na-apụghị idochi. Ma iji nọgide ma dị mkpa, ndị a ọkachamara a ga-adi mkpa mgbe niile ma ọ bụrụ na ha na-eme ihe ọmụma na mmụta ọhụrụ ngwaọrụ.

A na-atụkwa anya na a ga-achọ ndị ọrụ ọhụrụ n'ọrụ ugbo. Ọnụọgụgụ ndị bi na mbara ala na-eto eto, tinyere na onye ọ bụla kwesịrị iri nri. Mana ọzọ, ihe a ga-chọ ga-abụ ndị injinia nwere nka karịa karịa n'ọrụ ugbo.

Enweghịzi ọrụ

Ọtụtụ ọrụ agaghịzi adị n'oge na-adịghị anya. Ndị a bụ ụdị ọrụ na-adị mfe ịmegharị.

Nke a bụ ụfọdụ ọrụ nwere ike ịpụ n'ahịa ọrụ n'oge adịghị anya:

Ọrụ ndị ahịa (ndị na-akwụ ụgwọ, ndị na-ere ahịa, ndị ndụmọdụ, wdg); njikwa ụlọọrụ (N'ihi mmụba na ndị si n'ụlọ arụ ọrụ); Ntinye data (Ndị na-ede akwụkwọ na ngalaba nke ọnụọgụgụ, ego, ndị na-ede akwụkwọ, ndị ntụgharị teknụzụ); Akaụntụ; Ndị ọrụ ụlọọrụ na-arụ ọrụ ugboro ugboro .

Ịkọ akụkọ

Otu ọrụ ọzọ, nke ndị na-eme n'ọdịnihu na-adịghị ekwu maka ya, mana ọ ga-adị mkpa n'ọdịnihu bụ nke ndị na-akọ akụkọ.

Dịka ụdị mkpa ọ dị ọtụtụ puku afọ gara aga, ọrụ nkepụta ọbụla metụtara mgbasa nke ahụmịhe mmadụ ka ga-adị mkpa.

Ndị na-ede akwụkwọ, ndị na-ede uri, ndị nduzi, ndị na-eme ihe nkiri, ndị na-akpa ọchị, ndị na-ese ihe, na ndị na-agụ egwú ga-adị mkpa mgbe niile ọbụrụgodi na AI na-enweta ihe ịma aka na ngalaba ndị a.