Ihe ndị ị maghị maka Vincent Ogbulafor bụbu onyeisioche PDP lara mmụọ
Ihe ndị ị maghị maka Vincent Ogbulafor bụbu onyeisioche PDP lara mmụọ
Ebe foto si, Benue State Government
Onye bụbu onyeisioche otu People's Democratic Party (PDP) bụ Vincent Ogbulafor, alakwurula ndị nna ochie ka ọ gbachara afọ 73.
Gọvanọ Benue steeti bụ Samuel Ortom, bụ onye gbara ama ọnwụ ya n'ozi nkasi obi o zigara gọvanọ Abia steeti bụ Okezie Ikpeazu, tụrụ arịrị na ọ nwụrụ "oge nka ya ịchịkọta pati gaara enye aka imezi esemokwu dị na pati anyị ugbua."
N'ozi ahụ nke ọnụ na-ekwuru ya bụ Nathaniel Ikyur binyere aka, Ọrtom sị, "Nnukwu ihe efuola otu PDP na ndị ochịchị obodo nwere agba. Ezi nghọta o nwere n'okwu ndọrọndọrọ ọchịchị efuola anyị."
Ndị dị Ogbulafor nso kwuru na ọ nwụrụ n'abalị asaa nke ọnwa Ọktoba na mba Kanada.
Ogbulafor bụ Odeakwụkwọ Ukwu mbụ pati ahụ, nwụrụ na mba Kanada n'abalị Tuzde.
Vincent Ogbulafor bụbu Onyeisioche otu PDP site n’afọ 2008 ruo ọnwa Mee, afọ 2010 bụ mgbe ọ gbara arụkwaghịm n'ihi ebubo nrụrụaka.
Ụlọọrụ Independent Corrupt Practices Commission (ICPC), kpụpụrụ ya ụlọikpe maka ebubo imefu ego ruru nde N104 mana e mechara tọpụ ya si na ikpe amaghị ya.
Tupu ọ banye ọkwa onyeisioche PDP, Ogbulafor bụ odeakwụkwọ ukwu mbụ nke pati ahụ.
Ugbua, i nwereike inweta akụkọ BBC Igbo niile n'ekwenti gị.
Pịa aka ebe a ka i soro anyị
Ebe Ọkwa azụmahịa WhatsApp kwụsịrị
Ogbulafor bụ anụ kpọrọ nkụ na-eju ọnụ e ji ikwu okwu na-apụta ụka mara.
N'afọ 2008, o kwuru na "PDP dịka pati na-achị na steeti 28 ga-anọ n'ọchịchị ruo afọ 60."
O kwukwara sị, "Ọ gbasaghị m ma Naijiria bụ mba naanị otu pati na-achị. Ọ bụrụ na onye ọbụla bata n'okpuru otu ncheanwụ, ị mara na ọ pụtara na anyị na-arụ ọrụ ọma."
N’otu mkparịtaụka o nwere, o kwuru na “Oge m bụ odeakwụkwọ ukwu (PDP) anyị kwudoro steeti 21 bụ PDP n’aka Barnabas Gemade."
"Anyị kwalitere ya o rue 28 ma mụbakwa ọnụ ọgụgụ ndị nke anyị n’Ụlọomeiwu Naijria. Ugbua dịka Onyeisioche , Naijiria niile ga-dịrịrị na PDP.”
N'afọ 2010, o kwuru na ọchịchị Naijiria ga-alaghachi n'Ugwu Awụsa ma sị na' a na-enye Musa Yar'Adua nkwado dị pasentị 101."
Nwa eze n’obodo Olokoro dị Umuahia South, Abia steeti, ọ rụkwara ọrụ dịka Minista na-ahụ maka okwu metụtara nkwalite akụnaụba na ọrụ pụrụ iche n’oge ọchịchị Olusegun Obasanjo.
Ọ rụrụ ọrụ dịka Komishọna na-ahụ maka ọrụ n’Abịa steeti.
A mụrụ ya n’afọ 1949.
Ọ hapụrụ nwunye ya bụ Ifeoma Ogbulafor, ụmụ ya na ụmụ ụmụ were nwụọ.
