#Freeowerri112: Ihe ji bupu ụfọdụ ụmụnwaanyị Ipob-Ndị ọrụ mkpọrọ
Madugba James bụ ọnụ na-ekwuru ụlọ mkpọrọ n'Imo Steeti akọwala ihe mere eji bupu ụfọdụ ụmụnwaanyị Ipob gawa n'ụlọ mkpọrọ dị n'Okigwe.
Ọ gwara BBC Igbo na "ọ bụ maka ha karịrị otu narị bụ nke ụlọ mkpọrọ dị n'Owere enweghi ngwa zuru oke eji elekọta ha nille."
"Nke a mere eji buru mmadụ iri n'ime ha gawa ụlọ mkpọrọ dị n'Okigwe ebe a ga-elekọta ha anya dịka ụmụnwaanyị."
Madugba gara n'ihu kwuo na ha ga-enyocha ụmụnwaanyị ndị a ahụ iji chọpụta ndị bu afọime ma ọ bụ ọrịa ndị ọzọ.
O kwuru na ọ bụ iji gbochie ebubo na-ekwu na ọtụtụ ụmụnwaanyị na-atụrụ ime n'ime ụlọ mkpọrọ.
Cheta na ndị uweojii Imo steeti nwụchiri ụmụnwaanyị ndị a karịrị otu narị n'izuụka gara aga ebe ha na-eme ngagharịiwe n'owere.
Akpọpụrụ ha n'ụlọikpe ebe ọkaikpe S.K. Durumba kwuru ka akpọchie ha n'ụlọ mkpọrọ rue ọnwa Seputemba. Ụmụnwaanyị Ipob: Buhari na-achọ nnukwu okwu
