KAI TSAYE, Labaran wasannin BBC Hausa na ranar 9 zuwa 14 ga watan Maris, 2026

Rahoto kai-tsaye

Haruna Kakangi

1. 12 Maris 2026Shin fenaritin da aka bai wa Arsenal ta dace?

   

   Asalin hoton, Getty Images

   Mutane ne ta yin tsokaci kan bugun fenaritin da aka bai wa Arsenal a wasanta da Bayer Leverkusen a gasar Zakarun Turai na Champions League da aka buga a daren ranar Laraba.

   Arsenal ta yi amfani da bugun fenaritin wajen farke ƙwallo ɗaya da masu masukin baƙin suka zura mata.

   Noni Madueke ne ya faɗi a cikin da'ira bayan haɗa jiki da Malik Tillman.

   Duk da cewa an duba har da na'ura, lafari ya tabbatar cewa tabbas bugun fenariti ne, duk da ƙorafin da ƴan wasan Bayer suka riƙa yi.

   Dama tun bayan da ya shiga fili, Madueke ya riƙa jan ƴan wasan Bayer a guje cikin filin.

   "A nawa ganin, Madueke ya faɗi ne a hankali, amma tabbas an haɗa jiki, saboda haka na'ura na da ƙwaƙƙwarar hujjar cewa akwai fenariti," in ji Matt Upson, tsohon ɗan wasan baya na Arsenal.

   

   Asalin hoton, Getty Images

2. 12 Maris 2026Ko ƙungiyoyin Premier za su kai labari a Champions League?

   

   Asalin hoton, Getty Images

   Ƙungiyoyin gasar Premier a Ingila ba su ji da daɗi ba a wasannin da suka buga na gasar zakarun Turai ta Champions League da aka buga a wannan mako.

   Real Madrid ta yi wa Manchester City biɗi-biɗi ta hanyar lallasa ta da ci 3-0.

   Wannan na nufin cewa City na da jan aiki a gabanta idan tana so ta kai mataki na gaba a gasar.

   Abin da ya faru da City ya yi kama da ɗan karen dukan da Tottenham ta sha a hannun Atletico Madrid da ci 5-2 a daren ranar Talata.

   Chelsea ma ba ta sha da daɗi ba a hannun PSG, inda ita ma aka tashi 5-2.

   Liverpool ta sha kashi a hannun Galatasary, yayin da Arsenal ta yi canjaras da Bayer Leverkusen 1-1, ita ma Newcastle canjaras ɗin ta yi da Barcelona a gida, inda aka tashi 1-1.

   Wasannin Laraba:

   • Bayer Leverkusen 1-1 Arsenal
   • Bodoe/Glimt 3-0 Sporting CP
   • Paris Saint-Germain 5-2 Chelsea
   • Real Madrid 3-0 Manchester City

   Wasannin Talata:

   • Galatasary 1-0 Liverpool
   • Atalanta 1-6 Bayern Munich
   • Atletico Madrid 5-2 Tottenham Hotspur
   • Newcastle United 1-1 Barcelona

3. 9 Maris 2026An bai wa ƴan wasa 23 katin kora bayan dambacewa a fili

   

   Asalin hoton, Getty Images

   Lafari ya lafta wa ƴan wasa 23 jan kati bayan bai wa hammata iska da aka yi tsakanin ƴan wasan ƙungiyar Cruzeiro da kuma Atletico Mineiro a wasan ƙarshe na kofin Campeonato Mineiro a ƙasar Brazil.

   Ɗan wasan Cruzeiro Kaio Jorge ne ya ci ƙwallo ɗaya da ta bai wa ƙungiyarsa nasara 1-0, domin zama zakaru karon farko tun daga shekara 2019.

   To sai dai dambe ya ɓarke a gab da tashi wasan, lamarin da ya sanya dole sai dai jami’an tsaro suka shiga tsakani, abin da ya kai ga cewa an bai wa ƴan wasa 23 jan kati.

   Dambe ya kaure ne bayan golan ƙungiyar Atletico ya ture ɗan wasan Cruzeiro har ƙasa, sannan ya danna gwiwarsa a kan ƙirjin ɗan wasan, bayan sun yi karo a lokacin da dukkaninsu ke son kai wa ga ƙwallo.

   Na take ƴan wasan ɗayan ɓangaren suka taso suka cakume golan inda suka haɗa shi da ƙarfen raga, inda nan take filin ya rikiɗe zuwa filin dambe tsakanin ƴan wasa, yayin da jami’an tsaro suka yi ƙoƙarin shiga tsakani.

   Duk da cewa ba nan take ne aka bayar da jajayen katunan ba saboda shi ma lafari yana ta kansa, daga baya an sanar cewa an bai wa ƴan wasa 13 jan kati.

   An bai wa ƴan wasa 12 na ƙungiyar Cruzeiro jan kati, ciki har da gola, yayin da aka bai wa ƴan wasa 11 na Atletico jan katin.

4. 9 Maris 2026City za ta kara da Liverpool, Arsenal da Southampton a kofin FA

   

   Asalin hoton, Getty Images

   Ƙungiyar Port Vale mai buga wasa a matakin League One a Ingila za ta kara da Chelsea a zagayen kwata-fainal na kofin ƙalubale na FA, yayin da ita kuma ƙungiyar Manchester City za ta karɓi baƙuncin Liverpool.

   Arsenal wadda ta fi kowace ƙungiya a Ingila lashe kofin, inda take da 14, za ta kara ne da Southampton.

   Leeds kuwa za ta yi tattaki ne domin karawa da ko dai West Ham ko kuma Brentford, waɗanda ke wasa a ranar Litinin.

   A yanzu ƙungiyar Port Vale ita ce ƙungiya mafi rauni a gasar, kuma wannan ne karo na farko da za ta kara da Chelsea a wata gasa tun daga shekara 1929.

   Za buga wasannin ne a ranakun 4 da kuma 5 ga watan Afrilu.

   Ga yadda karawar za ta kasance:

   • Southampton v Arsenal
   • Chelsea v Port Vale
   • Manchester City v Liverpool
   • West Ham United v Leeds United