KAI TSAYE, Abubuwan da ke faruwa a Najeriya da sauran sassan duniya, Lahadi 01/03/2026

Rahoto kai-tsaye

Abdullahi Bello Diginza

1. Mintuna 2 da suka wuceHotunan ɓarnar da hare-haren Iran suka yi kan sansanonin sojin Amurka

   Hotuna na ci gaba da bayyana na yadda baƙin hayaƙi ke tashi bayan harin ramuwar gayyar Iran kan sansanonin sojin Amurka da ke Gabas ta Tsakiya.

   An ɗauki wasu daga cikin hotunan cikin dare, wasu kuma da safe a ƙasashen Bahrain da Haɗaɗdiyar Daular Larabawa.

2. Mintuna 45 da suka wuceHarin Iran ya lalata wani gini a birnin Tel Aviv na Isra'ila

   Harin makami mai linzamin Iran ya lalata wani gida a tsakiyar Tel Aviv, babban birnin Isra'ila.

   Rahotonni daga ƙasar sun ce harin ya yi sanadin mutuwa mace guda, wadda ita ce mutuwa da farko da aka bayar da rahotonta a Isra'ila tun bayan fara wannan yaƙi.

   Isra'ila ta kakkaɓo kusan duka makaman linzami da Iran ta harba cikinta.

   Amma duk da haka wasu sun samu faɗawa ciki, musamman bayan tarwatsewa a sama.

3. Sa'a 1 da ta wuceIraƙi ta ayyana makokin kwana uku bayan kisan Khamenei

   Gwamnatin ƙasar Iraƙi ta ayyana makokin kwana uku a fadin ƙasar domin nuna alhini kan kisan jagoran addainin Iran Ayatollah Ali Khamenei.

   Cikin wata sanarwar da gwamnatin ƙasar ta fitar, ta aike da saƙon jaje ga al'ummar Iran, kan kisan jagoran addinin ƙasar, wadda ta bayyana da ''aikin takalar faɗa''.

4. Sa'a 1 da ta wuceDubban Iraniyawa na jimamin mutuwar jagoran addinin ƙasar

   Dubban Iraniya sun taru a birnin Tehran domin yin alhinin mutuwar jagoran addinin ƙasar, Ayatollah Ali Khamenei da Amurka da Isra'ila suka kashe a hare-harensu.

   Tuni dai hukumomin ƙasar suka sanar da makokin kwanaki 40 a faɗin ƙasar

   Ayatollah Ali Khamenei na da farin jini da ƙarfin faɗa a ji a ƙasar Iran

   Ya shafe fiye da shekara 35 yana jan ragamar ƙasar, mai ƙarfin faɗa a ji a yankin Gabas ta Tsakiya.

5. Sa'a 1 da ta wuce'Jiragen Iran sun yi ruwan boma-bomai kan sansanonin sojin Amurka'

   Kamfanin dillancin labaran Iran, IRNA ya ce jiragen yaƙin ƙasar sun yi ruwan boma-bomai kan sansanonin sojin Amurka da ke yankin Gulf da yankin Kurdistan na Iraƙi.

   Dakarun sojin Iran sun ce jiragen yaƙin ƙasar sun samu nasarar kai munanan hare-hare kan sansanonin.

   Sojojin sun ƙara da cewa ''duka sansanonin maƙiya'' a yankin ba su gagari jiragen yaƙin mu ba.