Tun bayan ambaliyar Maiduguri 'ruwa kawai nake sha in shayar da jaririna'

Wata mahaifiya da ambaliyar Maiduguri ta ritsa da ita, ta ce suna matuƙar buƙatar abinci a sansanin Bakassi da aka ajiye su.

Falmata Goni ta ce ta kuɓuta daga gidansu wanda ruwa ya cinye tare da ƴaƴanta bakwai, kafin hukumomi su kwaso su a mota.

Mahaifiyar wadda ga alama tana cikin halin kaɗuwa ta ce ba ta iya samun abinci sai dai kawai ta sha ruwa kuma a hakan ta shayar da jaririnta.

A cewarta, sauran ƴaƴan nata na samun abin da suke ci ne daga ɗan tallafin da suka samu a maƙwabta.

Hukumomi a jihar Borno sun ce mutane kimanin miliyan biyu ne ambaliyar ruwan ta shafa a birnin Maiduguri.