Garin da macizai ke son hana noma

Garin Kaltungo da ke jihar Gombe ya zama tamkar ramin gansheƙa duk inda mutum ya shiga zai iya karo da maciji.

Babu babba ba yaro, macizai na saran duk wanda ƙaddara ta faɗawa.

Yanzu haka noma na neman gagarar al'ummar garin saboda yadda macizan ke saran su.

Wani babban abu kuma shi ne irin tsadar da maganin kashe dafin yake da shi, inda ake sayan kwalba daya daga naira 50,000 zuwa 80,000.

Sai dai gwamnatin jihar ta ce tana iya bakin ƙoƙarinta wajen ganin ta rage wa al'ummar garin raɗaɗin tsadar maganin.

Manoman sun ce macizan kan maƙale a ƙarƙashin amfanin gona kamar gyaɗa, ta yadda za zarar manomi ya je kusa da amfanin domin yin noma ko tugewa sai su sare shi.