BBC ઇન્ડિયન સ્પૉર્ટ્સવુમન ઑફ ધ યર ઍવૉર્ડ 2020 : વિજેતાની જાહેરાત 8 માર્ચે થશે

'બીબીસી ઇન્ડિયન સ્પૉર્ટ્સવુમન ઑફ ધ યર 2020' માટે વોટિંગ પૂર્ણ થઈ ગયું છે.

ભારત અને વિદેશથી લોકોએ ઍવૉર્ડનાં પાંચ નૉમિની ખેલાડીઓમાંથી પોતાનાં પસંદગીનાં મહિલા ખેલાડીને વોટ આપ્યા હતા અને વિજેતાની જાહેરાત આઠ ફેબ્રુઆરીએ થશે.

ઍવૉર્ડનાં નૉમિની છે તેમાં શૂટર મનુ ભાકર, દોડવીર દુતી ચંદ, ચેસ ખેલાડી કોનેરુ હમ્પી, કુસ્તીબાજ વિનેશ ફોગટ અને ભારતીય મહિલા હોકી ટીમનાં કૅપ્ટન રાની સામેલ છે.

જે મહિલા ખેલાડીને સૌથી વધુ વોટ મળ્યા તેઓ બીબીસી ઇન્ડિયન સ્પૉર્ટ્સવુમન ઑફ ધ યર બની જશે.

આઠ માર્ચ 2021 સોમવારે દિલ્હીમાં એક વર્ચુઅલ સમારોહમાં વિજેતાની જાહેરાત થશે. બીબીસીની ભારતીય ભાષાઓની વેબસાઇટ અને બીબીસી સ્પૉર્ટ્સની વેબસાઇટ પર પરિણામની જાહેરાત કરવામાં આવશે.

'મહિલા દિવસ 2021'ના રોજ બીબીસી એક મહિલા ખેલાડીને લાઇફટાઇમ અચીવમેન્ટ ઍવૉર્ડ પણ આપશે. આ વર્ચુઅલ ઇવેન્ટમાં બીબીસી તરફથી એક મહિલા ખેલાડીને 'ઇન્ડિયન ઇમર્જિંગ પ્લેયર ઑફ ધ યર ઍવૉર્ડ'થી પણ નવાજવામાં આવશે.

આ પાંચેય નૉમિનીને ગણમાન્ય નિષ્ણાતોની એક પૅનલ દ્વારા પસંદ કરવામાં આવ્યાં છે જેમાં રમતજગત સાથે જોડાયેલા ખેલાડીઓ અને લેખકો સામે છે.

બૅડમિન્ટન ખેલાડી પીવી સિંધુને ગત વર્ષે 'બીબીસી ઇન્ડિયન સ્પૉર્ટ્સવુમન ઑફ ધ યરનો ઍવૉર્ડ' આપવામાં આવ્યો હતો અને પીટી ઊષાને 'લાઇફટાઇમ અચીવમેન્ટ ઍવૉર્ડ' આપવામાં આવ્યો હતો.

આ વખતનાં નૉમિની મહિલા ખેલાડીઓ પર નજર કરીએ :

1. મનુ ભાકર

ઉંમર : 19 વર્ષ, સ્પૉર્ટ્સ : ઍરગન શૂટિંગ

માત્ર 16 વર્ષની ઉંમરે આંતરરાષ્ટ્રીય શૂટિંગ સ્પૉર્ટ્સ ફેડરેશનના વર્લ્ડ કપ 2018ની 10 મીટર ઍર પિસ્તોલ ઇવેન્ટમાં મનુ ભાકરે ગૉલ્ડ મેડલ જીત્યો હતો.

આ મેડલ જીતનારા તેઓ સૌથી યુવાન ભારતીય હતાં. મનુ ભાકરે 2018માં યોજાયેલા યુથ ઑલિમ્પિક્સ ગેમ્સમાં પણ ગોલ્ડ મેડલ જીત્યો હતો.

આજ વર્ષે તેમણે કૉમનવેલ્થ ગેમ્સની વુમન 10 મીટર ઍર પિસ્તોલ ઇવેન્ટમાં 240.9 પોઇન્ટનો રૅકૉર્ડ સ્કોર બનાવીને ગોલ્ડ મેડલ જીત્યો હતો. 2019માં પણ તેમણે વર્લ્ડ કપ ફાઇનલની વુમન 10 મીટર ઍર પિસ્તોલ ઇવેન્ટમાં ગોલ્ડ મેડલ જીત્યો હતો.

2. દુતી ચંદ

ઉંમર : 26, સ્પૉર્ટ્સ : ઍથલેટિક્સ

દુતી ચંદ હાલ વુમન 100 મીટર ઇવેન્ટમાં ભારતના નેશનલ ચૅમ્પિયન છે. તેમણે નેપ્લસ ખાતે 2019માં યોજાયેલી વર્લ્ડ યુનિવર્સિઍડની 100 મીટર દોડમાં ગોલ્ડ મેડલ જીત્યો હતો.

તેમને 2020માં અર્જુન ઍવૉર્ડથી નવાજવામાં આવ્યાં હતાં. 2016ની રિયો ઑલિમ્પિક્સમાં દુતી કોઈ પણ ઑલિમ્પિકની 100 મીટર દોડ સ્પર્ધામાં ભાગ લેનારાં ત્રીજા ભારતીય મહિલા બન્યાં હતાં.

2018માં જકાર્તા ખાતે યોજાયેલી એશિયન ગેમ્સમાં તેમણે વુમન 100 મીટર ઇવેન્ટમાં સિલ્વર મેડલ જીત્યો હતો. તેઓએ 1998 પછી ભારત માટે સૌથી પહેલો મેડલ જીત્યો હતો.

દુતીના શરીરમાં પુરુષ હૉર્મોન્સનું પ્રમાણ વધુ જોવા મળતા મહિલા ખેલાડી તરીકે રમતોત્સવમાં ભાગ લેવા પર પ્રતિબંધ લાદવામાં આવ્યો હતો.

દુતીએ 2015માં કોર્ટ ઑફ આર્બિટ્રેશન ફૉર સ્પૉર્ટ (કેસ)માં અપીલ કરી. તેનું પરિણામ દુતીની તરફેણમાં આવ્યું હતું અને તેઓ કેસ જીતી ગયાં હતાં.

2015માં તેમના પરથી પ્રતિબંધ હઠી ગયો.

દુતી ચંદ એ ભારતના પ્રથમ રમતવીર છે જેમણે જાહેરમાં પોતે 'ગે' હોવાનો સ્વીકાર કર્યો છે. તે ખૂબ જ ગરીબ પૃષ્ઠભૂમિમાંથી આવ્યાં છે.

3. કોનેરુ હમ્પી

ઉંમર : 33, સ્પૉર્ટ્સ : ચેસ

વુમન વર્લ્ડ રેપિડ ચેસ ચૅમ્પિયન, 2019

કોનેરુ હમ્પી ચેસની રમતમાં અત્યાર સુધીના સૌથી શ્રેષ્ઠ ખેલાડીઓમાંનાં એક છે.

દક્ષિણ ભારતના આંધ્ર પ્રદેશમાં જન્મેલાં કોનેરુને તેમના પિતાએ નાની ઉંમરમાં ચેસની રમત શીખવી હતી. 2002માં તેમણે 15 વર્ષથી પણ ઓછી વયે સૌથી નાની ઉંમરના ગ્રાન્ડ માસ્ટર બનીને નામના મેળવી હતી.

આ રૅકૉર્ડને ચીનની હૌઉ યિફાને 2008માં તોડ્યો હતો. કોનેરુ બે વર્ષની પ્રસૂતિની રજાઓ બાદ ગેમમાં પરત ફર્યા હતા અને 2019માં વુમન રેપિડ વર્લ્ડ ચૅમ્પિયનનું ટાઇટલ જીત્યું હતું.જે હાલ સુધી યથાવત છે.

પુનરાગમન પછી તેમની જીતનો સિલસિલો ચાલુ રહ્યો છે અને તેમણે 2020માં કૈર્નસ કપમાં જીત મેળવી.

ભારતનો સર્વોચ્ચ સ્પૉર્ટ્સ પુરસ્કાર અર્જુન ઍવૉર્ડ 2003 તેમને મળ્યો હતો પછી તેમને ભારતનું ચોથું સૌથી નાગરિક સમ્માન પદ્મશ્રી 2007માં આપવામાં આવ્યું હતુ.

4. વિનેશ ફોગટ

ઉંમર : 26, સ્પૉર્ટ્સ : ફ્રીસ્ટાઇલ રેસલિંગ

બ્રૉન્ઝ, વર્લ્ડ રેસલિંગ ચૅમ્પિયનશિપ

આંતરરાષ્ટ્રીય મહિલા કુસ્તીબાજોના પરિવારમાંથી આવતાં વિનેશ ફોગટ 2018માં જકાર્તા એશિયન ગેમ્સમાં ગોલ્ડ મેડલ જીતનારાં પહેલા ભારતીય મહિલા કુસ્તીબાજ બન્યાં હતાં.

ફોગટના નામે કૉમનવેલ્થ ગૅમ્સના બે ગોલ્ડ મેડલ છે. તેઓ એવાં પહેલાં મહિલા કુસ્તીબાજ છે જેમણે કૉમનવેલ્થ અને એશિયન ગેમ્સમાં ગોલ્ડ મેડલ જીત્યો હોય.

તેમણે સપ્ટેમ્બર 2019માં પહેલી વખત બ્રૉન્ઝ મેડલ મેળવીને વર્લ્ડ ચૅમ્પિયનશિપમાં પોતાનો પહેલો મેડલ જીત્યો.

જાન્યુઆરી 2020માં વિનેશ ફોગટે રોમ રૅન્કિંગ સિરીઝમાં ગોલ્ડ મેડલ જીત્યો હતો. તેમણે ગત વર્ષે કોરોના વાઇરસને હરાવ્યો હતો.

5. રાની

ઉંમર : 26, સ્પૉર્ટ્સ : હૉકી

કૅપ્ટન, ભારતીય મહિલા હોકી ટીમ

રાની 'વર્લ્ડ ગેમ્સ ઍથ્લીટ ઑફ ધ યર' ઍવૉર્ડ જીતનારાં પહેલા હૉકી પ્લેયર છે.

તેમણે આ ઍવૉર્ડ 2020માં જીત્યો હતો. ભારતીય મહિલા હૉકી ટીમે ટોકિયો ઑલિમ્પિકમાં પોતાનું સ્થાન પાક્કું કર્યું તેમાં રાનીએ નવેમ્બર 2019માં અમેરિકાની સામે કરેલા ગોલને ગણવામાં આવે છે.

તેઓ 2016માં રીયો ઑલિમ્પિકની ભારતીય ટીમનો ભાગ હતાં. 2010માં રાની વર્લ્ડ કપમાં રમનારાં સૌથી યુવાન ભારતીય ખેલાડી બન્યાં હતાં અને તેમણે 2010ના વર્લ્ડ કપમાં 'યંગ પ્લેયર ઑફ ધ ટુર્નામૅન્ટ'નો ઍવોર્ડ જીત્યો હતો.

ભારતીય ટીમે 2018 એશિયન ગેમ્સમાં સિલ્વર મેડલ જીત્યો હતો, જ્યારે 2018ના વર્લ્ડ કપની ક્વાર્ટર ફાઇનલમાં પહોંચ્યું હતું અને કૉમનવેલ્થ ગેમ્સમાં ચોથા ક્રમે એ જ વર્ષે રહ્યું હતું.

હરિયાણાના હાથલારી ચલાવતા પરિવારમાંથી રાની આવે છે. 2020માં તેમને પદ્મશ્રી ઍવૉર્ડથી સમ્માનિત કરવામાં આવ્યાં હતાં.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો