'મેં ટૉપ જ ના કર્યું હોત તો લોકોને મને ટ્રોલ કરવાનો મોકો ન મળ્યો હોત'
ઉત્તર પ્રદેશના સિતાપુર જિલ્લામાં આવેલા મહમૂદાબાદની સીતા ઇન્ટર કૉલેજમાં છેલ્લા એક અઠવાડિયાથી ઉત્સવ જેવો માહોલ છે. આ કૉલેજમાં પ્રાચી નિગમ અને શુભમ વર્મા સહિત 19 વિદ્યાર્થીઓ ભણે છે. આ વિદ્યાર્થીઓએ હાઇસ્કૂલ અને ઇન્ટર-મીડિએટમાં યુપી બોર્ડમાં પ્રદેશમાં ટૉપ 10મા વિશેષ સ્થાન મેળવ્યું છે.
બધા જ આ ટૉપર્સ પર ગર્વ કરી રહ્યા છે. જોકે, પ્રાચી નિગમને કેટલાક લોકો તરફથી ટ્રોલિંગનો સામનો કરવો પડ્યો હતો.
પ્રાચી કહે છે, “હું જ્યારે આ પ્રકારનાં ટ્રોલિંગ અને ભીડને જોઉં છું તો લાગે છે એક-બે નંબર ઓછા આવ્યા હોત તો સારું હોત. હું ટૉપ ન કરત તો લોકોનું ધ્યાન મારા ચહેરા પર ન પડત. મને મારા ચહેરા પર ઊગેલા એ લાંબા વાળનો અનુભવ બોર્ડમાં ટૉપ કર્યા પછી ટ્રોલ કરનાર લોકોએ જ કરાવ્યો.”
પ્રાચીના ચહેરા પર વાળ નવમા ધોરણથી જ ઊગવાના શરૂ થઈ ગયા હતા.
પ્રાચીના આ શારીરિક બાંધા વિશે શાળામાં કે ઘરે કોઈએ પણ ક્યારેય ટિપ્પણી ન કરી. પ્રાચીને પોતાના ચહેરા પર વધી રહેલા વાળનો ક્યારે અહેસાસ જ નહોતો.
પ્રાચી નિગમે આ વખતે હાઇસ્કૂલમાં 591 ગુણ મેળવ્યા છે.
પ્રાચીએ ચહેરા પર એક સ્મિત સાથે કહ્યું, “જો હું પ્રથમ ન આવી હોત તો આટલી ફેમસ ન થઈ હોત. સોશિયલ મીડિયાએ મને ખૂબ જ ફેમસ કરી દીધી. દરેક જગ્યાએથી ઘણા ફોન આવી રહ્યા છે. ઘરે આખો દિવસ લોકોની ભીડ હોય છે.”
પ્રાચીએ કહ્યું, “દરેક ઇન્ટરવ્યૂમાં ટ્રોલિંગ પર વધારે વાત થઈ રહી છે. લોકોએ પૂછી-પૂછીને કે હું કેવી દેખાઉં છું તેની અનુભૂતિ કરાવી દીધી. મને જ્યારે જરૂર લાગશે ત્યારે હું પોતાનો ઇલાજ કરાવીશ. હું અત્યારે તો અભ્યાસ પર મારું ધ્યાન કેન્દ્રિત કરવા માગું છું.”
