આ તારીખથી ગુજરાતમાં ફરી 'સાર્વત્રિક વરસાદ' પડશે, આવતા અઠવાડિયે કેવું હવામાન રહેશે?
ઇમેજ સ્રોત, ANI
તા. 14મી ઑગસ્ટથી ગુજરાતમાં ફરી એક વખત વરસાદી માહોલ શરૂ થશે અને ઑગસ્ટ મહિનાના બીજા પખવાડિયામાં મેઘરાજા હેત વરસાવશે તેવી શક્યતા છે.
હવામાન વિભાગની આગાહી પ્રમાણે, બંગાળની ખાડીમાં એક સિસ્ટમનું સર્જન થઈ રહ્યું છે, જેના કારણે ગુજરાત સહિત મધ્ય અને પશ્ચિમ ભારતમાં ફરી એક વખત ચોમાસું ઍક્ટિવ થશે.
સ્વતંત્રતા દિવસ, જનમાષ્ટમી તથા લોકમેળા દરમિયાન લગભગ સમગ્ર ગુજરાતમાં વરસાદ શરૂ થઈ જશે.
હાલ ગુજરાતમાં ગત વર્ષની સરખામણીએ વરસાદની લગભગ 10 ટકા જેટલી ઘટ છે, ત્યારે આ સમાચાર તંત્ર, ખેડૂતો તથા સામાન્ય લોકો માટે રાહતજનક બની રહેશે.
હાલમાં ગુજરાતના અનેક ડૅમોની જળસપાટી ચિંતા ઉપજાવે તેવી છે, પરંતુ સિઝનના બાકી લગભગ 50 દિવસ દરમિયાન તે સામાન્ય થઈ જશે, એવી સંભાવના વ્યક્ત કરવામાં આવે છે. ત્યારે આગામી દિવસો દરમિયાન કેવું ક્યાં કેટલો વરસાદ પડશે તેની ઉપર નજર કરીએ.
સપ્તાહની શરૂઆતની સ્થિતિ
ઇમેજ સ્રોત, imd.gov.in
હવામાન વિભાગની આગાહી પ્રમાણે, રવિવારે સવારના ભાગે દક્ષિણ ગુજરાતના નવસારી અને વલસાડ ઉપરાંત કેન્દ્રશાસિત દમણ અને દાદરાનગર હવેલીમાં અનેક સ્થળોએ કલાકના 15મીમી કે તેથી વધુનો વરસાદ પડી શકે છે.
તો સાબરકાંઠા, ગાંધીનગર, અમદાવાદ, ભાવનગર, આણંદ ખેડા, સાબરકાંઠા, અરવલ્લી, મહીસાગર, દાહોદ, પંચમહાલ, ભરૂચ, નર્મદા અને છોટા ઉદેપુરમાં સવારના ભાગે અનેક સ્થળોએ પણ વરસાદની આગાહી છે.
સૌરાષ્ટ્રના રાજકોટ, સુરેન્દ્રનગર, ભાવનગર, જૂનાગઢ, પોરબંદર, દેવભૂમિ દ્વારકા, અમરેલી, બોટાદ, ગીર સોમનાથ અને મોરબી તથા કચ્છ જિલ્લામાં અમુક સ્થળોએ દિવસ દરમિયાન હળવોથી મધ્યમ વરસાદ પડી શકે છે.
End of સૌથી વધારે વંચાયેલા સમાચાર
વડોદરા, સુરત, છોટા ઉદેપુર, ભરૂચ, નર્મદા, ડાંગ, તાપી, વલસાડ અને નવસારીમાં ઉપરાંત ઉત્તર ગુજરાતના અમદાવાદ, ગાંધીનગર, આણંદ, પંચમહાલ, દાહોદ, મહિસાગર, બનાસકાંઠા, પાટણમાં અમુક સ્થળોએ હળવોથી મધ્યમ વરસાદ ગાજવીજ સાથે પડી શકે છે.
કેન્દ્રશાસિત દીવ, દમણ અને દાદરા નગર હવેલીમાં પણ છૂટાછવાયાં સ્થળોએ હળવાથી મધ્યમ વરસાદની આગાહી કરવામાં આવી છે.
સોમવારે તથા મંગળવારે પણ મહદંશે રવિવાર જેવું જ વાતાવરણ રહેશે, તેવી સંભાવના વ્યક્ત કરવામાં આવી છે. જ્યારે રાજ્યના દરેક જિલ્લામાં અમુક સ્થળોએ ગાજવીજ સાથે હળવોથી મધ્યમ વરસાદ પડી શકે છે.
ચોમાસાની ઘટ અને રાહત
ઇમેજ સ્રોત, Getty Images
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
રવિવાર સવારની સ્થિતિ પ્રમાણે, ગત વર્ષની સરખામણીએ હજુ સુધી લગભગ 8.93 ટકા ઓછો વરસાદ નોંધાયો છે.
ગત વર્ષે અત્યારસુધીમાં કુલ જરૂરિયાતનો 70.35 ટકા (621.18 મીમી) વરસાદ પડી ગયો હતો, જોકે, ચાલુ વર્ષે હજુ સુધી 64.07 ટકા (564.99 મીમી) વરસાદ જ પડ્યો છે.
જોકે, 14 કે 15 ઑગસ્ટ આસપાસથી ગુજરાતમાં ફરી એક વખત વરસાદનો સ્પેલ શરૂ થવાની સંભાવના છે.
બંગાળની ખાડીમાં સિસ્ટમનું સર્જન થઈ રહ્યું છે, જે લો-પ્રેશર એરિયામાં ફેરવાઈને ગુજરાત તરફ આગળ વધશે અને વરસાદ લાવશે. ઑગસ્ટ મહિનાના છેલ્લા 15 દિવસ દરમિયાન વરસાદ પડવાની શક્યતા છે.
જોકે, સિસ્ટમ કઈ દિશામાં અને કઈ ગતિથી આગળ વધશે, તેની ગુજરાતના કયા જિલ્લા ઉપર કેટલી અસર પડશે તે અંગેની સ્પષ્ટતા આગામી દિવસો દરમિયાન થશે.
ત્યાર સુધી ખેડૂતોએ પોતાના પાકને પિયત આપવું પડશે અને જેમની પાસે પિયતની વ્યવસ્થા નથી, તેમણે લગભગ એક અઠવાડિયું ધીરજ રાખવી પડે તેવી શક્યતા છે.
ડૅમોની સ્થિતિ
રાજ્ય સરકારના તાજેતરના ડેટા પ્રમાણે, ગુજરાતના કુલ 207માંથી 30 ડૅમ જ પૂર્ણકક્ષાએ ભરાયા છે. આમાંથી અડધા (15) સૌરાષ્ટ્રમાં છે, જ્યાં હાલ વરસાદની ઘટ છે. સૌરાષ્ટ્રમાં 141 નાના-મોટા ડૅમ આવેલા છે.
દક્ષિણ ગુજરાતના 13માંથી આઠ ડૅમ છલકાઈ ગયા છે, જ્યારે ઉત્તર ગુજરાતના 15માંથી એક પણ ડૅમ આખો નથી ભરાયો.
ત્યાં સિઝનનો 55 ટકા જેટલો જ વરસાદ પડ્યો છે, જે રાજ્યની કુલ સરેરાશ કરતાં ઓછો છે. ગુજરાતના અન્ય વિસ્તારોમાં (કચ્છ, મધ્યપૂર્વ, દક્ષિણ તથા ઉત્તર ગુજરાત) સિઝનનો 65 ટકા કરતાં વધુ જેટલો વરસાદ પડી ગયો છે.
સરદાર સરોવર તેની કુલ ક્ષમતાના 76.13 ટકાએ ભરાયેલો છે.
બીબીસી માટે કલેક્ટિવ ન્યૂઝરૂમનું પ્રકાશન
