ગુજરાતના હવામાનમાં પલટો, આગામી દિવસોમાં કયા જિલ્લામાં વરસાદ પડશે?
છેલ્લા કેટલાક દિવસોથી ગુજરાતમાં ઠંડીનું પ્રમાણ વધ્યું છે ત્યારે આજે સવારથી રાજ્યમાં હવામાનમાં પલટો આવ્યો છે. જેના કારણે રાજ્યના કેટલાક ભાગોમાં આગામી દિવસોમાં વરસાદ પડે તેવી શક્યતા છે.
આમેય ઠંડી મોડી શરૂ થઈ છે અને હજુ પણ સમગ્ર ગુજરાતમાં જોઈએ તેવી ઠંડી પડતી નથી. એવા સમયે હવામાન ખાતાની આગાહી પ્રમાણે 26 ડિસેમ્બરથી ત્રણ દિવસ સુધી અલગ-અલગ ભાગમાં વરસાદ પડવાની શક્યતા છે.
જોકે, તીવ્ર શીતલહેરની કોઈ ચેતવણી આપવામાં આવી નથી. બીજી તરફ ઉત્તર ભારતમાં સામાન્યથી મધ્યમ ધુમ્મસ છવાયેલું છે અને પહાડી વિસ્તારોમાં હિમવર્ષા થવાની પણ આગાહી કરવામાં આવી છે.
હાલમાં શિયાળુ પાકની સિઝન ચાલી રહી છે અને એવામાં હવામાન વિભાગની વરસાદની આગાહી ખેડૂતોમાં ચિંતા ફેલાવી શકે તેમ છે.
રાજ્યના કયા જિલ્લામાં વરસાદ પડવાની આગાહી છે?
ઇમેજ સ્રોત, imd
હવામાન વિભાગ અનુસાર, 26 ડિસેમ્બર, ગુરુવારે કચ્છ, બનાસકાંઠા, પાટણ, મહેસાણા, સાબરકાંઠા, અરવલ્લી, મહીસાગર, પંચમહાલ, દાહોદ, છોટા ઉદેપુર અને નર્મદા જિલ્લામાં વરસાદ પડી શકે છે.
આ ઉપરાંત તે જ દિવસો સૌરાષ્ટ્રમાં જામનગર, દેવભૂમિ દ્વારકા, પોરબંદરમાં પણ વરસાદ પડવાની શક્યતા છે. આ સિવાયના વિસ્તારોમાં હવામાન સૂકું રહેવાની આગાહી છે.
27 ડિસેમ્બર, શુક્રવારે કચ્છ, બનાસકાંઠા, સાબરકાંઠા, અરવલ્લી, મહીસાગર, પંચમહાલ, દાહોદ, છોટા ઉદેપુર, નર્મદા, તાપી, નવસારી, ડાંગ અને વલસાડમાં વરસાદ પડી શકે છે. આ ઉપરાંત દમણ, દાદરા અને નગરહવેલીમાં પણ વરસાદ પડવાની શક્યતા છે.
28 ડિસેમ્બર, શનિવારે કચ્છમાં વરસાદ પડી શકે છે. આ ઉપરાંત દક્ષિણ ગુજરાતમાં છોટા ઉદેપુર, નર્મદા, તાપી, નવસારી, વલસાડ, ડાંગ જિલ્લામાં વરસાદ પડવાની શક્યતા છે.
End of સૌથી વધારે વંચાયેલા સમાચાર
અમદાવાદમાં લઘુતમ તાપમાન કેટલું રહેશે?
આગામી દિવસોના તાપમાન વિશે હવામાન ખાતાએ જણાવ્યું કે આગામી બે દિવસ સુધી લઘુતમ તાપમાનમાં કોઈ મોટો ફેરફાર થવાની શક્યતા નથી. ત્યાર પછી તાપમાનમાં બેથી ચાર ડિગ્રી સેલ્સિયસનો વધારો થઈ શકે છે. હાલમાં ગુજરાતમાં પૂર્વથી દક્ષિણ પૂર્વ દિશામાં પવન વહી રહ્યો છે.
23 ડિસેમ્બર, સોમવારે ગુજરાતમાં હવામાન મુખ્યત્વે સૂકું રહેવાની શક્યતા છે. અમદાવાદમાં સોમવાર સુધી આકાશ મુખ્યત્વે સ્વચ્છ રહેશે અને લઘુતમ તાપમાન 18 ડિગ્રી સેલ્સિયસ રહી શકે છે. હવામાન ખાતાએ શીતલહેરની કોઈ ચેતવણી આપી નથી.
આગામી સપ્તાહમાં દેશમાં ક્યાં હિમવર્ષા થશે?
ખાનગી હવામાન સંસ્થા સ્કાયમેટના અહેવાલ પ્રમાણે હાલમાં ઉત્તર ભારત તથા મધ્ય અને પૂર્વ ભારતમાં હવામાન સ્વચ્છ રહેશે.
25 અને 26 ડિસેમ્બરની આસપાસ મધ્ય પ્રદેશના કેટલાક ભાગમાં વરસાદ પડી શકે છે. 27 અને 28 ડિસેમ્બરે પહાડી વિસ્તારોમાં હિમવર્ષા થશે.
આ સાથે પંજાબથી લઈને હરિયાણા, ઉત્તર પ્રદેશ, બિહાર, મધ્ય પ્રદેશ, ગુજરાત, રાજસ્થાન અને મહારાષ્ટ્રમાં વરસાદ પડવાની શક્યતા છે.
દેશમાં છેલ્લા 24 કલાક દરમિયાન કિનારાવર્તી આંધ્ર પ્રદેશમાં હળવાથી લઈને મધ્યમ વરસાદ પડ્યો છે. કેટલીક જગ્યા પર ભારે વરસાદ નોંધાયો છે.
કિનારાવર્તી તામિલનાડુ, રાયલસીમા અને દક્ષિણ તેલંગણામાં પણ હળવાથી મધ્યમ વરસાદ નોંધાયો છે.
આંધ્રપ્રદેશ અને કિનારાવર્તી ઓડિશામાં હળવો વરસાદ પડ્યો છે. સ્કાયમેટના અહેવાલ મુજબ પંજાબ, દિલ્હી, ઉત્તર પ્રદેશ, મધ્ય પ્રદેશ અને ઝારખંડના કેટલાક ભાગોમાં હળવાથી મધ્યમ પ્રમાણમાં ધુમ્મસ હતું.
બીબીસી માટે કલેક્ટિવ ન્યૂઝરૂમનું પ્રકાશન
