Tokyo 2020: Simone Biles yikuye mu mukino wa nyuma ngo yite ku buzima bwe bwo mu mutwe
Ahavuye isanamu, Getty Images
Umunyamerika ukina imikino ngororangingo (gymnastics) Simone Biles unafite imidari ine ya zahabu yo mu mikino Olempike, yikuye mu mukino wa nyuma ukomatanye wo ku wa kane i Tokyo.
Biles, umugororangingo wa mbere w'Umunyamerika wageze kuri byinshi kurusha abandi w'ibihe byose, yavuze ko agomba kwibanda ku buzima bwe bwo mu mutwe, nyuma yuko ku wa kabiri yikuye mu mukino wa nyuma w'ikipe y'abagore.
Ukuriye ikipe y'Amerika ya Olempike, ndetse n'abandi bakinnyi bagenzi be, bashimye icyemezo cya Biles cyo gushyira imbere kwita ku buzima bwe bwo mu mutwe.
Uyu mukinnyi w'imyaka 24, yageze ku mikino ya nyuma yose itanu y'umukinnyi ku giti cye y'i Tokyo.
Ku wa kane yari yitezweho kurwana ku mudari we wo mu mikino ikomatanye, mbere yuko ahatana mu mikino ya nyuma ijyanye no kwicunda no kwinanura mu ntangiriro y'ukwezi kwa munani.
Ishyirahamwe ry'Amerika ry'imikino ngororangingo ryagize riti:
"Simone azakomeza kugenzurwa buri munsi mu kureba niba yashobora kwitabira imikino ya nyuma y'umukinnyi ku giti cye yo mu cyumweru gitaha cyangwa niba atabishobora".
"Dushyigikiye n'umutima wacu wose icyemezo cya Simone kandi turashima ubutwari bwe bwo gushyira imbere imibereho myiza ye. Umuhate we wongeye kugaragaza impamvu ari intangarugero kuri benshi cyane".
Ahavuye isanamu, Reuters
Biles yatsinze n'amanota yo hasi ya mbere kuri we mu mukino wo kwicunda (vault), ubwo yakinaga mu mukino ubanza wo kwakuranwa, mbere yuko yikura mu ikipe yakinnye umukino wa nyuma.
Yavuye mu kibuga ariko ahagaruka aje gushyigikira bagenzi be - basanganwe igikombe giheruka - ubwo begukanaga umudari wa feza (silver) w'umwanya wa kabiri, inyuma y'ikipe Olempike y'Uburusiya yegukanye umwanya wa mbere.
Umudari wa feza w'ikipe i Tokyo wabaye umudari wa gatandatu wa Olempike Biles yegukanye, ndetse bituma imidari yose hamwe amaze kwegukana mu marushanwa yo ku rwego rw'isi no mu mikino Olempike, igera kuri 30.
Nyuma yaho, Biles yagize ati: "Nyuma yuko nitwaye mu mukino, ntabwo nashakaga gukomeza. Ngomba kwibanda ku buzima bwanjye bwo mu mutwe. Ntekereza ko ubuzima bwo mu mutwe ubu buri henshi kurushaho mu mikino".
"Tugomba kurinda mu mutwe hacu n'imibiri yacu ntitugende gusa ngo dukore buri kintu icyo ari cyo cyose isi ishaka ko dukora".
"Ntabwo nkigirira icyizere cyinshi. Wenda ni ugusaza. Hari iminsi nk'ibiri aho buri muntu akoherereza ubutumwa kuri Twitter ukumva umutwaro w'isi [yose] ukuriho".
"Ntabwo turi abakinnyi gusa. Natwe turi abantu kandi rimwe na rimwe bisaba ko uba usubiye inyuma".
