Sergio Aguero: Barcelona igiye kugura uyu rutahizamu wa Man City
Ahavuye isanamu, Reuters
Rutahizamu wa Manchester City Sergio Aguero azajya muri Barcelona kuri kontaro y'imyaka ibiri ubwo kontaro ye muri City izaba irangiye mu mpera y'uku kwezi kwa gatandatu.
Uyu Munya-Argentina w'imyaka 32, avuye muri City yari amazemo imyaka 10, aho yabaye umukinnyi wa mbere umaze kuyitsindira ibitego byinshi kurusha abandi bose - ibitego 260 yatsinze mu mikino 390.
Umukino wa nyuma yayikiniye ni uwo ku wa gatandatu ushize ubwo yinjiraga mu kibuga asimbuye mu mukino wa nyuma wa Champions League ikipe ye yatsinzwemo na Chelsea ikayitwara igikombe.
Aguero yagize ati: "Twese turabizi ko Barcelona ari yo kipe ya mbere ikomeye ku isi".
"Ntekereza ko nafashe icyemezo cyiza cyo kuba hano kandi birumvikana ni intambwe nteye mu mwuga wanjye".
"Rwose ndishimye kandi nizeye ko nshobora gufasha ikipe kugira ibintu itsindira".
Kugira ngo Aguero azabe yashobora kuva muri Barcelona, ikipe izamwifuza izabanza kwishyura Barcelona miliyoni 100 z'ama-euro (arenga miliyari 120 y'u Rwanda) ku ruhande, atari ku giciro.
Aguero - watsindiye ibikombe 15 bikomeye mu gihe amaze ari kumwe na Manchester City, azasanga muri Barcelona uwo bakomoka mu gihugu kimwe akaba n'inshuti ye ya hafi Lionel Messi, mu gihe iyi kipe ishaka kugira icyo ihindura ku mwanya wa gatatu yasoje iriho muri shampiyona ya La Liga uyu mwaka.
Yasoje iri inyuma ya Atletico Madrid na Real Madrid, imaze kugurisha Luis Suarez muri Atletico kuri miliyoni 6 z'ama-euro mu ntangiriro y'uwo mwaka w'imikino.
Barça yasezerewe na Paris St-Germain muri kimwe cy'umunani cya Champions League, ariko mu kwezi kwa kane yatsinze Athletic Bilbao ibitego 4-0 yegukana igikombe cya Copa del Rey.
Messi ni we wayitsindiye ibitego byinshi, 38 mu marushanwa yose, mu gihe Abafaransa Antoine Griezmann (watsinze 20) na Ousmane Dembélé (watsinze 11) ari bo bakinnyi bandi bamukurikiye mu gutsindira Barcelona ibitego byinshi.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
BBC ntibazwa ibivuye ku zindi mbuga.
Aguero avuye muri Premier League ari ku mwanya wa kane mu bakinnyi bamaze gutsinda ibitego byinshi cyane mu mateka yayo, ibitego 184.
Ni na we mukinnyi w'umunyamahanga ukina muri Premier League watsinze ibitego byinshi, ndetse mu kwezi kwa mbere mu 2020 yakuyeho umuhigo wari ufitwe na Alan Shearer nk'uwatsinze ibitego bitatu mu mukino umwe inshuro nyinshi, yabitsinze inshuro 12.
Chelsea yari yavuzweho ko ishaka Aguero, ariko uyu yahisemo gusubira muri shampiyona yatsinzemo ibitego 74 mu myaka itanu yakiniye Atletico, mbere yuko ajya muri City mu 2011 aguzwe miliyoni 36 z'ama-pawundi.
Myugariro Eric Garcia wa City n'umukinnyi wo hagati wa Liverpool Georginio Wijnaldum, na bo bavuzweho ko bashobora kwerekeza muri Barcelona nk'abakinnyi basoje kontaro zabo.
