Ni ryari Liverpool ishobora kwegukana igikombe cya Premier League cy'uyu mwaka?

Liverpool yaraye yigiye imbere ho amanota 15 isatira kwegukana igikombe cya shampiyona y'Ubwongereza - Premier League - cy'uyu mwaka nyuma yo gutsinda Norwich igitergo 1 - 0 cya Sadio Mané.

Iyi kipe y'umutoza w'Umudage Jurgen Klopp ubu imaze kwanikira iyikurikiye - Manchester City - ku rutonde rw'agateganyo rwa shampiyona ho amanota 25, iyi Man City ikaba izahura na West Ham ku wa gatatu.

Nyuma y'imyaka 30 yo gukora amakosa no kugihusha bya hato na hato, igikombe cya mbere cya Premier League guhera mu mwaka wa 1990 bisa nkaho Liverpool ntaho cyayicikira uyu mwaka.

Ariko mu gihe abafana ba Liverpool bibazaga ko nta bindi byishimo bazabona uyu mwaka bitari ugutwara iki gikombe bamaze imyaka bategereje, bikomeje gusa nkaho bashobora cyane no kuzagitwarira ku kibuga cya mukeba baturanye cyane - Everton.

BBC Sport yacenshuye uko imibare ihagaze ngo imenye igihe n'aho Liverpool ishobora kongera kwegukanira igikombe cya Premier League.

Liverpool ishobora kugitwara muri uku kwezi kwa kabiri?

Igisubizo cyoroshye kuri iki kibazo ni oya.

Nubwo bwose Liverpool yatsinda imikino yayo yose muri uku kwezi, Manchester City izakina inshuro ebyiri gusa muri Premier League, rero ugendeye ku mibare, ntabwo yaba yavuye mu bahatanira igikombe mu ntangiriro y'ukwezi kwa gatatu.

Ni vuba he hashoboka Liverpool ishobora gutwara igikombe?

Urebye, Liverpool ishobora kuzatwara igikombe ku mukino uzayihuza na Bournemouth ku itariki ya 7 y'ukwezi gutaha kwa gatatu.

Ibyo byasaba ko Liverpool itsinda imikino yayo muri icyo gihe, naho Manchester City na Leicester City ya gatatu, zigatsikira.

Icyizere ntasubirwaho cyonyine Liverpool ifite ni uko gutsinda imikino itanu gusa mu mikino 12 isigaje bizaba biyihagije ngo yegukane igikombe cya shampiyona cy'uyu mwaka, ititaye k'uko andi makipe bahatanye azitwara.

Umukino wa gatanu wa Liverpool muri uru rwego izawukina na Crystal Palace yayakiriye ku kibuga cyayo cya Anfield ku itariki ya 21 y'ukwezi kwa gatatu - nubwo ushobora kwimurwa iramutse igeze muri kimwe cya kane cya FA Cup.

Ni iki gicyenewe ngo Liverpool yegukanire igikombe ku kibuga Goodison Park cyangwa Etihad?

Tubivuze mu buryo bworoshye, Liverpool icyeneye gukomeza gutsinda naho Manchester City yo igakomeza gutakaza amanota.

City iramutse itsinzwe umukino umwe mu mikino yayo itatu ya Premier League iri imbere hagati y'ubu n'itariki ya 14 y'ukwa gatatu, icyo gihe byaba bivuze ko gutsinda kwa Liverpool mu mukino w'amahari uzwi nka 'Merseyside derby' uyihuza na Everton yahita iwutwariramo igikombe ku itariki ya 16 y'ukwa gatatu ku kibuga Goodison Park cya Everton.

Byaba ari ibyishimo birenzeho ku bafana ba Liverpool, cyane ko mu mukino wabahuje mu mwaka ushize warangiye ari ubusa ku busa - uwo mukino wanabaye mu y'ingenzi yayibujije kwambura igikombe Manchester City yacyegukanye icyo gihe.

Icyo gihe, kwitwara nabi mu ntangiriro y'ukwezi kwa gatatu nibwo Liverpool iheruka gutakaza amanota, bigatuma nubwo yatsinze indi mikino icyenda yikurikiranya bidahaza kugira ngo inyure kuri City y'umutoza Guardiola, yisubije igikombe ku munsi wa nyuma wa shampiyona irusha Liverpool inota rimwe gusa.

Ariko nanone, Liverpool iramutse itsinzwe rimwe mbere yuko ikina na City ku kibuga cyayo cya Etihad ku itariki ya 4 y'ukwezi kwa kane, ishobora kwegukanira igikombe i Manchester.

Ni ryari hafi cyane ikipe yegukaniye Premier League mu mateka?

Manchester United ni yo ifite umuhigo wo kuba yaregukanye Premier League vuba cyane hashoboka, ubwo itozwa na Sir Alex Ferguson yegukanye igikombe cyo mu mwaka w'imikino 2000-2001 ku itariki ya 14 y'ukwezi kwa kane.

Igikombe cya Premier League cyegukanywe habura imikino micye cyane, utagendeye ku itariki ya vuba cyane, ni icyegukanywe habura imikino itanu ngo shampiyona irangire - na wo ni umuhigo washyizweho na Manchester United yo mu mwaka wa 2000-2001, ndetse na Manchester City yo mu mwaka w'imikino wa 2017-2018.

Ni ikihe kinyuranyo kinini cyane ikipe yashyizeho ku yindi nyuma y'imikino 25?

Inshuro nyinshi muri uyu mwaka w'imikino, Liverpool yongeye guca imihigo yari isanzwe iriho, ndetse kuba iri imbere ho amanota 25 nyuma y'imikino 26, ni yo manota menshi y'ikinyuranyo abayeho mu mateka ya Premier League kugeza ubu.

Ni ayahe manota menshi y'ikinyuranyo ikipe yagize NTITWARE igikombe?

"Byanshimisha tubatsinze, byanshimisha".

Ni nde ushobora kwibagirwa kwitotombera kuri televiziyo kwamamaye k'umutoza Kevin Keegan ubwo yabonaga ikipe ye ya Newcastle buhoro buhoro igenda yigizwayo ku mwanya wa mbere w'agateganyo na Manchester United mu gice cya kabiri cya shampiyona yo mu mwaka w'imikino wa 1995-1996?

Ikipe ye yari imbere ho amanota 12 mu ntangiriro y'umwaka wa 1996, ariko irangiza shampiyona y'uwo mwaka irushwa amanota ane na Manchester United ya mbere, yo iri ku mwanya wa kabiri.

Kugeza ubu, uwo ni wo ukiri umuhigo w'amanota menshi ikipe yagize y'ikinyuranyo ariko bikarangira idatwaye igikombe cya shampiyona ya Premier League.

Kuri ubu, uwo ni na wo muhigo Liverpool IDASHAKA guca.