Barcelone, ifite igikombe giheruka cya shampiyona, yatangiye itungurwa na Athletic Bilbao

Barcelone ifite igikombe cya shampiyona ya Espanye cy'umwaka ushize, yatangiye shampiyona y'uyu mwaka itsindwa na Athletic Bilbao.

Barcelone yagaragaje umukino udasamaje, ndetse bizakuyiviramo gutsindwa igitego ku munota wa 89 w'umukino, cyinjijwe na Aritz Aduriz w'imyaka 38 y'amavuko winjiye mu kibuga asimbura.

Luis Suarez na Rafinha bombi bagerageje amahirwe, ariko umupira ugarurwa n'icyuma cy'izamu.

Ariko Barcelone yakomeje kunanirwa kwigaragaza muri uwo mukino w'ejo ku wa gatanu nubwo yanakinishije umukinnyi wayo mushya Antoine Griezmann yaguze miliyoni 107 z'amapawundi.

Lionel Messi ntiyari mu kibuga kubera imvune yo ku mpfundiko na Philippe Coutinho nawe ntiyakinnye, mu gihe hakomeje kumvikana amakuru yuko ashobora kwerekeza muri Bayern.

Barcelone itari ifite abo bombi yarushijeho kugorwa ubwo Suarez yavaga mu kibuga kubera imvune mbere yuko igice cya mbere kirangira.

Iyi kipe y'umutoza Ernesto Valverde iri gushakisha igikombe cya shampiyona ya La Liga ku nshuro ya gatatu yikurikiranya.

Yanakinishije umukinnyi wo hagati Frenkie de Jong iheruka kugura muri Ajax kuri miliyoni 65 z'amapawundi, ariko iyi kipe yakomeje kugaragaza kutamenyerana mu kibuga.

Aduriz watsinze igitego cya Athletic Bilbao - wahoze ari rutahizamu wa Espanye - asanzwe yaramaze kuvuga ko azasezera ku mupira w'amaguru mu mpera y'uyu mwaka w'imikino, nyuma y'imyaka 20 akina.

Yitereye mu kirere atera umupira awigaramye, umunyezamu Marc-Andre ter Stegen ntiyamenya uko byagenze.

Yabaye itsinzi ya mbere itangira shampiyona ya Athletic Bilbao kuri Barcelone, bwa mbere guhera mu mwaka wa 2013.