Atletico Madrid ishinja Barcelone na Griezmann 'agasuzuguro'

Ikipe ya Atletico Madrid ishinja Barcelone "agasuzuguro" ndetse ikavuga ko iyi kipe yegukanye shampiyona yo muri Espanye yagiranye ibiganiro na rutahizamu wabo mu kwezi kwa gatatu.

Atletico ivuga ko yanze ubusabe bwa Barcelone bwo kugura Antoine Griezmann w'imyaka 28 y'amavuko ndetse ko yatagetse uyu Mufaransa kwitabira imikino yo kwitegura shampiyona itaha.

Mu itangazo Atletico yasohoye ku munsi w'ejo ku wa gatanu, yavuze ko "ibabajwe cyane n'imyitwarire ya bombi [Griezmann na Barcelone], cyane cyane Barcelone".

Mu kwezi kwa gatanu, Griezmann yavuze ko azava muri Atletico kuri iyi mpeshyi.

Griezmann amaze gutsindira Atletico ibitego 94 mu mikino 180 amaze gukina muri shampiyona ya Espanye izwi nka La Liga, ndetse ahanini byitezwe ko yerekeza muri Barcelone.

Muri kontaro ye harimo ingingo ivuga ko ikipe yamugura igomba kwishyura miliyoni 120 z'ama-Euro, ariko Atletico ivuga ko Barcelone ishaka gusubika kwishyura ndetse ko imaze amezi igirana ibiganiro na we.

Itangazo rya Atletico ryongeraho riti: "Birumvikana, igisubizo cyacu [kuri Barcelone] nticyari cyiza. Mwumve ko bombi Barcelone n'umukinnyi basuzuguye Atletico n'abafana bayo bose".

"Ku itariki ya 14 y'ukwa gatanu, Antoine Griezmann yamenyesheje ikipe icyemezo cye cyo kuyivamo mu mpera y'umwaka w'imikino".

"Mu minsi yakurikiyeho, Atletico yamenye ko Barcelone n'uyu mukinnyi bagiranye amasezerano mu kwezi kwa gatatu, neza neza mu minsi ya nyuma y'umukino wacu wo kwishyura wa Champions League waduhuje na Juventus, kandi bari baratangiye kuganira guhera hagati mu kwezi kwa kabiri".

"Ni ikintu dufata ko gihonyora ibihe byemewe byo kugirana ibiganiro n'abakinnyi ndetse kikarenga ku mategeko ya ngombwa agenga ubunyangamugayo mu irushanwa mu mikino yose, ndetse bikaba n'igihombo gikomeye ku ikipe yacu no ku bafana babarirwa muri za miliyoni".

'Nta na rimwe tuganira n'abandi bakinnyi'

Mbere yaho ejo ku wa gatanu, Josep Bartomeu, Perezida wa Barcelone, yari yavuze ko iyi kipe yagiranye ibiganiro na Griezmann kandi ko n'uwahoze ari rutahizamu wayo Neymar "ashaka kuva muri Paris St-Germain".

Uyu Munyabrezili w'imyaka 27 y'amavuko yavuye muri Barcelone ajya muri Paris St-Germain mu mwaka wa 2017 aguzwe miliyoni 222 z'ama-Euro - amafaranga ya mbere menshi ku isi yari atanzwe mu kugura umukinnyi w'umupira w'amaguru - ndetse byakomeje kuvugwa ko yasubira muri Barcelone.

Bartomeu yanavuze ko azi aho myugariro Matthijs de Ligt w'Ubuholandi w'imyaka 19 y'amavuko, bivugwa cyane ko azava muri Ajax, azaba akina umwaka utaha w'imikino.

Barcelone yarangije kugura mugenzi we Frenkie de Jong bakinana mu ikipe y'igihugu y'Ubuholandi no muri Ajax ifite igikombe cya shampiyona yaho.

Ejo ku wa gatanu, Bartomeu yagize ati: "Ejo [ku wa kane] ni bwo bwa mbere twavuganye na Griezmann. Hari ubushake, ni yo mpamvu twavuganye".

"Nta na rimwe tuganira n'abakinnyi bo mu yandi makipe".