Derby County yahaye umwanya Lampard ngo ajye kuvugana na Chelsea

Ikipe ya Derby County yahaye umutoza wayo Frank Lampard igihe gito adatoza iyi kipe kugira ngo ajye kuvugana n'ikipe ya Chelsea ishaka kumuha akazi.

Lampard w'imyaka 41 y'amavuko, kuri uyu wa mbere cyangwa ku wa kabiri ntabwo azatoza.

Ikipe ye yasohoye intangazo rimenyesha ko iki cyemezo cyafashwe kugira ngo bifashe kurangiza ibiganiro arimo n'ikipe yahoze akinira vuba bishoboka.

Derby yemeje ko izahita yihutira "gushaka umusimbura".

Jody Morris, umutoza wungirije wa Derby, na we ntabwo aza kuba ari gutoza, bikaba bivugwa ko ashobora kujyana na Lampard muri Chelsea.

Biteganyijwe ko ikipe ya Derby County ijya muri Amerika ku wa kane gutangirirayo imyitozo yo gutegura amarushanwa ari imbere.

John Terry wahoze ari kapiteni wa Chelsea yavuze ko "nta wundi muntu uri mu mwanya mwiza" wo gutoza Chelsea nk'uyu mugenzi we bahoze bakinana.

Lampard ari kuvugana na Chelsea yakiniye imyaka 13 aho ashobora kujya gusimbura Maurizio Sarri uherutse kuva muri iyi kipe akajya gutoza Juventus y'iwabo mu Butaliyani.

Lampard yakiniye Chelsea imikino 648, atwarana nayo ibikombe 11 bikomeye kuva avuye mu ikipe yakiniye mu bugimbi bwe ya West Ham mu 2001 aguzwe miliyoni 11 z'amapawundi.