Chelsea yahawe uburenganzira bwo kuganira na Frank Lampard

Chelsea yahawe uburenganzira bwo kuganira na Frank Lampard, umutoza w'ikipe ya Derby County, ku mwanya w'ubutoza ubu udafite umukozi muri Chelsea.

Lampard w'imyaka 41 wamaze imyaka 13 muri Chelsea nk'umukinnyi, ashobora gusimbura Maurizio Sarri uherutse kujya muri Juventus nyuma y'umwaka umwe gusa muri Chelsea.

Chelsea yasabwa kwishyura hafi miliyoni enye z'amapawundi ikipe ya Derby County kugira ngo ivaneyo Lampard.

Ikipe ya Derby yasohoye itangazo ryemeza ko yemereye Chelsea kuganira nayo kuri iyi ngingo.

Gusa ivuga ko nta makuru arambuye yabitangaho mu gihe ntacyo amakipe yombi arumvikana.

Lampard yatangiye imirimo yo gutoza umwaka ushize, ubwo yahise ageza ikipe ye mu mikino ya nyuma y'irushanwa rya Championship aho batsinzwe na Aston Villa.

Lampard yakiniye Chelsea imikino 648, ayitwaramo ibikombe 11 bikomeye.

Abafana b'ikipe ya Derby County bafite ubwoba bwo kuba bashobora kubura uyu mutoza bari baragiriye icyizere kuko yahaye ibihe byiza iyi kipe mu mwaka umwe gusa akayigeza kure.

Lampard yari amaze kumenyerana n'abafana ba Derby County mu byishimo igihe batsinze, ubwo yajyaga imbere yabo agasimbukana na bo mu byishimo. Ibintu bashobora gukumbura cyane nagenda.

Yaba asubiye 'mu rugo'

Lampard yageze muri Chelsea ari umusore w'imyaka 23 avuye mu ikipe ya West Ham aguzwe miliyoni 11 z'amapawundi.

Yatwaranye nayo igikombe cy'amakipe yabaye aya mbere iwayo i Burayi (Champions League) ndetse n'icya Europa League, kandi yatwaranye na Chelsea ibikombe bitatu bya shampiyona, bine bya FA na bibiri bya 'League Cups'.

Mu mwaka w'imikino wa 2004 - 2005, Lampard wakinaga hagati yatsindiye Chelsea ibitego 13, indi myaka yakurikiyeho nabwo yatsinze buri mwaka nibura ibitego 10.

Yavuye muri Chelsea ayitsindiye ibitego 211, akaba ari nawe ufite uyu muhigo w'ibitego byinshi muri Chelsea.

Yavuye i Stamford Bridge mu 2014 ajya muri Manchester City aho yatsinze ibitego bitandatu mu mikino 32 yahakinnye.

Nuko ajya mu ikipe ya New York City yo muri shampiyona ya Major League Soccer yo muri Amerika, yatangiye gukinira mu kwezi kwa munani mu 2015, mbere yuko muri 2017 asezera ku gukina umupira w'amaguru yari amazemo imyaka 21.

Kuva yatangira gukinira ikipe y'igihugu y'Ubwongereza - izwi ku izina Three Lions - mu mwaka wa 1999, Lampard yayikiniye imikino 106, atsindamo ibitego 29.

Yakinnye kandi mu mikino y'ibikombe bitatu by'isi.