Igitego cya Can wa Liverpool cyaba ari cyo cyiza muri shampiyona?

Cyari igitego cye cya karindwi atsinze muri shampiyona kuva yava mu Budage mu myaka itatu ishize, ariko ishoti ritangaje rya Emre Can ryahaye intsinzi ikomeye Liverpool yatsinze Watford ku wa Mbere.

Uyu mukinnyi wo mu bo hagati yatsinze igitego cyiza cyane ku mupira yari ahawe na Lucas arikaraga mu kirere umupira uruhukira mu izamu.

Kuba ikipe itozwa na Jurgen Klopp iri ku mwanya wa gatatu, iki gitego gishobora kuba ingoboka ikomeye mu isiganwa ryo kurwanira umwanya wa Champions League. Ariko se cyari igitego cyiza kurusha ibindi muri shampiyona yose?

Umutoza Klopp yagize ati:

"Twatsinze igitego cyiza cyane"

"Ahubwo ndifuza kongera kukireba, buri wese ari kukivugaho"

"Nakibonye rimwe ariko cyari cyiza cyane. Nahindukiye gato sinakibona neza kinjira mu rushundura."

Klopp yongeyegho ati:

"Ni umuhungu mwiza, umukinnyi mwiza kandi yari agikwiye."

Liverpool yatsinze ibitego bitangaje muri iyi shampiyona, birimo n'iby'abandi bakinnyi nka Jordan henderson, Sadio Mane na Georginio Wijnaldum byose byabaye ibitego byiza by'ukwezi mu kiganiro cy'imikino cya Match Of the Day kuri BBC.

Can ufite ibitego 11 mu mikino 100, si umukinnyi utsinda cyane.

Ndetse na we ubwe yiyemereye ko iki gitego ari cyo cyiza cyane kurusha ibindi yatsinze kugeza ubu.

Can yagize ati:

"Sigeze ntsinda igitego nk'iki mbere. Wenda igihe nari muto. Kiriya ni cyo gitego cyiza ntsinze."

"Nari mfite umwanya ndahindukira, nabanje gushaka guteresha umutwe ariko sinabitekerejeho cyane."

Mugezi we bakinana Adam Lallana, wari wagarutse mu mukino nyuma y'imvune yavuze ko abandi bakinnyi ba Liverpool bagiye kujya bemerera Can akagerageza amashoti nk'ariya mu gihe cy'imyitozo.

Igitego cyiza cy'umwaka kizatoranywa mu mpera za shampiyona.

Umukinnyi wa Tottenham Dele Alli yahawe igihembo cy'igitego cyiza kurusha ibindi mu mwaka ushize yari yatsinze Crystal Palace.

Umukinnyi wa Liverpool uheruka gutsindira iki gihembo ni Steven Gerrard muri 2006 mu mukino w'igikombe cya FA.