Francine Niyonsaba mu mateka ya Olempike ku Burundi

Umunonotsi w'Umurundikazi, Francine Niyonsaba, asiganwa imetero 800 yaraye ahesheje u Burundi umudari Olempike ugira kabiri mu mateka y'ico gihugu.

Francine Niyonsaba yaraye aronse umudari w'umwakaka abaye uwa kabiri mu nkino Olempike zibera i Rio de Janeiro mu gihugu ca Brezil.

Yirutse imetero amajana umunani mu munota 1 imisegonda 56 n'ibice 49, aza inyuma y'umunye Afrika y'epfo, Caster Semenya yatahukanye umudari w'inzahabu, uwa gatatu akaba yabaye Margaret Nyairera Wambui aserukira Kenya.

Umudari w'umwakaka Francine yatahukanye niwo wonyene u Burundi buronse muri izi nkino Olempike, ukaba ari uwa kabiri buronse mu mateka yabwo y'izi nkino.

Umudari wa mbere u Burundi bwaronse wari uw'inzahabu mu nkino Olempike z'i Atlanta muri Leta Zunze Ubumwe za Amerika mu 1996, aho Venuste Niyongabo yatsinda mu gusuganwa imetero 5000.