Amerika igiye kugurisha intwaro za miliyari 11$ muri Taiwan ihanganye n'Ubushinwa

Guverinoma ya Trump yatangaje igurishwa ry'intwaro rifite agaciro kagera kuri miliyari 11 z'amadolari (hafi tiriyari 16 z'amafaranga y'u Rwanda) kuri Tayiwani, ririmo imbunda zirasa ibisasu byoherezwa kure (rocket launchers), ibisasu byitwara ubwaryo (self-propelled howitzers) n'ubwoko butandukanye bwa za misile.

Iri gurishwa, rikiri mu nzira yo kwemezwa n'Inteko Ishinga Amategeko ya Amerika (Congress), rizaba ari ubwa kabiri rikozwe ku gihugu cya Tayiwani kuva Donald Trump asubiye muri White House/Maison Blanche (ibiro bya perezida wa Leta Zunze Ubumwe z'Amerika).

U Bushinwa, bufata Tayiwani nk'intara yabwigometseho, bwamaganye icyi cyemezo, buvuga ko "kibangamiye bikomeye ubwigenge, umutekano, n'ituze ry'igihugu cy'u Bushinwa."

Minisiteri y'Ingabo ya Tayiwani yashimiye Amerika ivuga ko iri gurishwa nirishyirwa mu ngiro, rizabafasha bakabasha kwiyubakira ubushobozi bukomeye bwo kwirwanaho, n'ubudahangarwa.

Amerika isanzwe ifitanye umubano na Beijing aho kuba na Taiwani, kandi imaze imyaka myinshi igendera ku murongo wa diplomasi w'akataraboneka. Ku rundi ruhande ariko, ikomeje kuba umufatanyabikorwa ukomeye wa Taiwani ndetse ikaba ari yo iyiha intwaro nyinshi.

Iri gurisha rishya ry'intwaro ryarakaje Ubushinwa, bwongereye igitutu kuri Tayiwani mu myaka ishize binyuze mu myitozo ya gisirikare no kwinjira kenshi mu mazi no mu kirere cyayo.

Umuvugizi wa minisiteri y'ububanyi n'amahanga y'Ubushinwa, Guo Jiakun yagize ati: "Amerika irashaka gushyigikira ubwigenge bwa Tayiwani ikoresheje ingufu, ariko bizayigaruka, kandi kugerageza gukumira Ubushinwa ikoresheje Tayiwani ntibizashoboka."

Yongeyeho ati: "Ibi bizihutisha gusa inzira ijya ku miterere y'akaga n'imvururu mu nyanja ya Tayiwani,"

Izi ntwaro nshya ziteganyijwe kugurishwa zirimo High Mobility Artillery Rocket Systems zifite agaciro ka miliyari 4$ n'imbunda za Howitzers zifite agaciro ka miliyari 4$, nk'uko byatangajwe n'Ikigo cya Amerika gishinzwe umutekano w'igisirikare, ku mugoroba wo ku wa gatatu.

Ingano y'izi ntwaro nizagurishwa zose, zizaba ziruta kure ibyagurishijwe inshuro 19 byageraga kuri miliyari 8.38$ mu gihe cya Joe Biden.

Departema ya Leta ya Amerika yavuze ko kugurisha izi ntwaro bihesha inyungu Washington "mu gushyigikira Tayiwani mu gukomeza kuvugurura ingabo zayo no kugira ubushobozi bwo kwirwanaho buri ku rwego rwo hejuru."

Ubushinwa bumaze igihe buhiga kwigarurira Taiwani kandi ntibwigeze buvanaho amahirwe yo gukoresha ingufu kugira ngo bubigereho.

Ni icyago gikomeye kuri Taiwani, ikaba inateganya kongera ingengo y'imari y'ingabo ikagera kuri 3% by'umusaruro mbumbe w'igihugu umwaka utaha no kugera kuri 5% mu 2030.

Mu kwezi kwa 10, Perezida Lai Ching-te yatangaje kubaka sisitemu y'ubwirinzi bwo mu kirere isa n'igipfundikizo cyo kurinda "ibitero by'abanzi", atavuze Ubushinwa mu izina.

Ubushinwa bukomeje kwitwara nk'ubufite imbaraga mu karere, bigatuma butera ubwoba abaturanyi binyuze mu bikorwa bidasanzwe. Muri Kamena (6), Ubuyapani bwagaragaje impungenge nyuma y'imyitozo idasanzwe y'indege z'intambara z'Ubushinwa mu nyanja ya Pasifika.

Vuba aha, ibyo bihugu byombi byongeye guterana amagambo ku gitekerezo cya Minisitiri w'Intebe w'Ubuyapani, ko Ubuyapani bushobora kohereza ingabo zabwo mu gihe Ubushinwa bwaba bugabye igitero kuri Tayiwani.

Ibibazo byarushijeho gukara muri uku kwezi ubwo ubwato bw'impande zombi bwahanganye hafi y'ibirwa bipfa, ndetse indege z'intambara z'u Bushinwa zigatunga radar ku ndege z'u Buyapani