Qatar 2022: Abakinnyi b'Ubufaransa barwaye 'barimo kuguma mu byumba byabo'

Ishyirahamwe ry'umupira w'amaguru mu Bufaransa (FFF) ryemeje ko abakinnyi benshi b'ikipe y'igihugu y'Ubufaransa barwaye ibicurane n'inkorora, Raphaël Varane na Ibrahima Konaté bakaba ari bo ba vuba aha barwaye ntibitabire imyitozo.

Myugariro Dayot Upamecano n'umukinnyi wo hagati Adrien Rabiot, kubera uburwayi ntibabonetse mu mukino wo ku wa gatatu wa kimwe cya kabiri Ubufaransa bwatsinzemo Maroc ibitego 2-0.

Rutahizamu Randal Kolo Muani yavuze ko abanduye bishyize mu kato mu byumba byabo.

Ubufaransa burakina na Argentine ku mukino wa nyuma w'igikombe cy'isi ku munsi w'ejo ku cyumweru, saa kumi n'imwe z'umugoroba (17h) ku isaha yo mu Rwanda no mu Burundi.

Kolo Muani yagize ati: "Abarwaye baguma mu byumba byabo".

Yongeyeho ati: "Barimo kwitabwaho n'abaganga kandi dukomeje gukaza uburyo bwo guhana intera. Ntiturimo kubujenjekaho na gacye".

Rutahizamu Ousmane Dembélé yemeranya na we, akavuga ko ikipe "idatewe ubwoba" n'iyi virusi.

Ati: "Dukomeje gufata ingamba zo kwirinda kandi ndatekereza ko buri wese azaba yiteguye [umukino]".

Mu kiganiro n'abanyamakuru kuri uyu wa gatandatu, umutoza w'Ubufaransa Didier Deschamps yavuze ko barimo kugerageza kubana n'iyi virusi.

Ku wa gatatu, Deschamps yavuze ko yiteze ko Upamecano na Rabiot bazaba bameze neza bihagije bagashobora gukina umukino wa nyuma.

Ariko mu gihe Konaté na Varane baba badashoboye gukina, umutoza Deschamps yaba ari mu rungabangabo (mu kibazo cy'amahitamo) kuko yaba adafite babiri muri ba myugariro be batatu bakomeye.