Amafoto: Ijoro 'riruta ayandi muri fashion' - Met Gala yaraye ibaye havuzwe cyane imyambarire

Ijoro ryacyeye ryabayemo igitaramo cya Met Gala ya 2026 ryafashwe nk'iriruta ayandi yose mu bijyanye n'imyambarire.

Ibyamamare byajyanishije cyane n'intero y'uyu mwaka – ubugeni mu kwambara – aho abateguye iki gikorwa basabye abakizamo kwambara mu buryo budasanzwe.

Igikorwa ngarukamwaka giterwa inkunga na Costume Institute y'ikigo Metropolitan Museum of Art y'i New York ari naho cyabereye, gifatwa nk'amahirwe ku byamamare yo kwerekana imideli igezweho mu birori.

Urutonde rw'abatumirwa uyu mwaka rwariho ibyamamare, nka Beyoncé umugabo Jay-Z we n'umwana wabo Blue Ivy umukinnyi wa cinema Nicole Kidman, icyamamare muri Tennis Venus William n'umuvandimwe we Serena, ndetse na Naomi Osaka nawe ukina Tennis.

Abandi batambutse barimo Madonna, Bad Bunny, Heidi Klum, Katy Perry, Machael B Jordan, Steph Curry icyamamare muri Basketball n'abandi.

Bamwe muri ibi byamamare bari bambaye imyenda idasanzwe ku buryo bitari byoroshye guhita umenya abo ari bo.

Beyoncé n'umuryango we

Beyoncé ni ubwa mbere yari abonetse kuri 'tarpis/carpet' ya Met Gala mu myaka 10 ishize, mu kwisubiza icyo gihe cyose yahabuze yabonetse bidasanzwe.

Yaserutse mu ikanzu nini kandi itendera kugera kure iriho n'ibishushanyo by'amagufa n'ingofero y'amababa, yakozwe n'umunyamideli w'umufaransa Olivier Rousteing.

BBC yamwegereye ari kuri 'carpet'. Abajijwe uko yiyumva kugaruka hano, Beyoncé yagize ati: "Birashimishije kubana hano n'umukobwa wanjye n'umugabo wanjye".

Umukobwa we Blue Ivy w'imyaka 14 yari umwihariko mu bakiri bato batumiwe. Ubusanzwe ibi birori byinjiramo gusa abantu barengeje imyaka 18.

Ushobora kureba niyi videwo: