Al-Hilal yasabye kugura Mbappé ku muhigo wa miliyoni £259 muri PSG

    • Umwanditsi, Simon Stone
    • Igikorwa, BBC Sport

Ikipe ya Al-Hilal yo muri Saudi Arabia (Arabie Saoudite) ifite uruhushya rwo kuvugana na Kylian Mbappé nyuma yo gusaba kugura kuri miliyoni 259 z'amapawundi (miliyari 391Frw), amafaranga aciye umuhigo w'isi, uyu rutahizamu w'ikipe ya Paris St-Germain (PSG).

Uyu kapiteni w'ikipe y'igihugu y'Ubufaransa, w'imyaka 24, usigaje umwaka umwe kuri kontaro ye muri PSG, yanze gushyira umukono ku masezerano yo kongera igihe cyo gukinira iyi kipe ifite igikombe cya shampiyona y'Ubufaransa.

Ndetse PSG yaramusize mu bakinnyi yajyanye na bo mu Buyapani mu ruzinduko rwo kwitegura umwaka mushya w'imikino.

PSG irashaka kugurisha Mbappé ubu, aho kugira ngo izabone ayivamo ku buntu (nta kiguzi) ku mpeshyi y'umwaka utaha.

Umuhigo w'isi usanzweho w'umukinnyi w'umupira w'amaguru waguzwe amafaranga menshi, ni ufitwe na Neymar, waguzwe miliyoni 200 z'amapawundi ubwo yajyaga muri PSG avuye muri Barcelona mu mwaka wa 2017.

Skip content and continue reading

End of content

PSG yavuguruye ingingo yo kuyivamo yo mu masezerano ya rutahizamu w'Umunya-Brazil Neymar, imugira umukinnyi wa mbere uhenze ku isi.

Mu gihe yaba ayivuyemo, Mbappé azaba ari we utanzweho ibiguzi bibiri muri bitatu byo hejuru cyane ku mukinnyi, nyuma yuko ageze muri PSG mu 2017 avuye muri Monaco aguzwe miliyoni 166 z'amapawundi.

Chelsea, Manchester United, Tottenham, Inter Milan na Barcelona, zose zagaragaje ko zifuza Mbappé, mbere wavuze ko yifuza kuva muri PSG ku buntu mu mpera y'umwaka w'imikino utaha ndetse bicyekwa ko yahitamo kujya muri Real Madrid.

Skip Ibisomwa cane and continue reading
Ibisomwa cane

End of Ibisomwa cane

PSG inemera igitekerezo cyuko Mbappé yayivamo atijwe kuri iyi mpeshyi kugira ngo umwaka we wa nyuma kuri kontaro ye awusoreze ahandi.

Ibi byatuma ashobora kujya muri Real Madrid nta kiguzi nyuma y'amezi 12, agakomeza gukina muri uyu mwaka w'imikino ndetse akinjiriza amafaranga PSG atanzwe n'ikipe yaba arimo gukinira nk'intizanyo.

Umuyobozi wa PSG Nasser Al-Khelaifi yasobanuye neza ko akomeye ku ho ahagaze ndetse habayeho kumvikanisha ko Mbappé ashobora kudakinishwa mu gihe cy'umwaka wose w'imikino mu gihe yaba yanze gucyemura iri hurizo ririho ubu.

Ibyo bibaye ntakinishwe umwaka wose w'imikino, byagira ingaruka ku cyizere cye cyo gukinira Ubufaransa mu irushanwa rya Euro ryo mu mwaka utaha wa 2024.

Al-Hilal ni imwe mu makipe y'ikigega cy'ishoramari cya Saudi Arabia. Iyi kipe kuri iyi mpeshyi yamaze kugura muri Wolves umukinnyi wo hagati w'Umunya-Portugal Ruben Neves, inagura muri Chelsea myugariro w'Umunya-Sénégal Kalidou Koulibaly.

Mbappé nta cyo yari yatangaza kuri ubwo busabe bw'iyo kipe, ariko yasubije ubutumwa bwo kuri Twitter bw'umukinnyi wa basketball w'icyamamare wo muri shampiyona ya NBA, Giannis Antetokounmpo, wateye urwenya agira ati: "Al Hilal mushobora kunyijyanira. Nsa na Kylian Mbappe"

Mbappé yasubije kuri ubwo butumwa akoresheje urukurikirane rwa 'emoji'.

Ingengabihe y'uko ibintu byakurikiranye

  • Ukwezi kwa Gicurasi (5) mu 2022: Mbappé yashyize umukono kuri kontaro ihenze y'imyaka ibiri irimo n'ingingo yo guhitamo niba yakongeraho umwaka umwe akinira PSG, yanga kujya muri Real Madrid.
  • Ukwezi kw'Ukuboza (12) mu 2022: Yatsinze ibitego bitatu mu mukino wa nyuma w'igikombe cy'isi ariko Ubufaransa butsindwa na Argentine kuri za penaliti.
  • Ukwezi kwa Werurwe (3) mu 2023: Yagizwe kapiteni w'ikipe y'igihugu y'Ubufaransa, asimbura Hugo Lloris wasezeye mu ikipe y'igihugu.
  • Ukwezi kwa Mata (4) mu 2023: Yatsindiye igikombe cya gatandatu cya shampiyona ya Ligue 1, kiba icya gatanu cya shampiyona atsindiye muri PSG.
  • Tariki ya 13 Kamena (6) mu 2023: Mbappé yatangaje kuri Twitter ko ashaka kuguma muri PSG ubu ariko ko atazongera igihe cya kontaro ye nyuma y'umwaka wa 2024.
  • Tariki ya 5 Nyakanga (7) mu 2023: Yabwiwe na Perezida wa PSG Nasser Al-Khelaifi ko agomba gushyira umukono kuri kontaro nshya niba ashaka kuguma muri iyi kipe.
  • Tariki ya 9 Nyakanga mu 2023: Mu byo yatangarije ikinyamakuru France Football, Mbappé yise PSG ikipe "icamo ibice".
  • Tariki ya 21 Nyakanga mu 2023: Yasizwe na PSG ku rutonde rw'abakinnyi yajyanye mu ruzinduko mu Buyapani no muri Koreya y'Epfo rwo kwitegura umwaka mushya wa shampiyona.
  • Tariki ya 22 Nyakanga mu 2023: Ishyirahamwe ry'abakinnyi b'umupira w'amaguru mu Bufaransa ryavuze ko rishobora kurega PSG mu rukiko nyuma yo kuyishinja gukorera Mbappé "itoteza mu bitekerezo" kubera kutamushyira mu bakinnyi yajyanye kwitegura shampiyona y'umwaka mushya w'imikino.
  • Tariki ya 24 Nyakanga mu 2023: Ikipe yaAl-Hilal yo muri Saudi Arabia yasabye kugura Mbappé ku muhigo w'isi wa miliyoni 259 z'amapawundi.