Uburusiya bwaciye amande Google kubera 'gutangaza amakuru anyuranyije n'amategeko'
Ahavuye isanamu, Reuters
Uburusiya bwaciye amande kompanyi y'ikoranabuhanga Google ya miliyari 21.1 z'ama-rouble akoreshwa mu Burusiya kubera kunanirwa guhagarika kugera ku makuru "abujijwe n'amategeko", ajyanye n'intambara yo muri Ukraine hamwe n'andi makuru.
Ayo mafaranga agera kuri miliyari 383 uyavunje mu mafaranga y'u Rwanda.
Ikigo Roskomnadzor cy'ubugenzuzi bw'itumanaho mu Burusiya cyavuze ko ayo makuru arimo n'amakuru y'"ibinyoma" atesha agaciro igisirikare cy'Uburusiya, ndetse n'amakuru ashishikariza abantu gukora imyigaragambyo.
Iki kigo cyavuze ko iyi kompanyi yo muri Amerika ihonyora "mu buryo bwateguwe" amategeko y'iki kigo.
Google ntiyahise igira icyo ibitangazaho.
Kompanyi ishamikiye kuri Google ikorera mu Burusiya mu kwezi gushize yatangaje ko yahombye.
Ibyo byabaye nyuma yuko abategetsi b'Uburusiya bafatiriye konti yo muri banki yaho y'iyo kompanyi, bituma bashobora kwiha (gufata) miliyari 7.2 z'ama-rouble iyo kompanyi yari yarategetswe kwishyura mu mwaka ushize ku mpamvu nk'izo.
Mu myaka ya vuba aha ishize, Uburusiya bwakomeje kongera igitutu kuri za kompanyi z'ikoranabuhanga, buzishinja kutagenzura neza ibyo zitangaza, no kwivanga muri gahunda bwite z'iki gihugu.
Ibikorwa by'Uburusiya byo kugenzura imbuga nkoranyambaga n'izindi mbuga z'amakuru byariyongereye kuva bwagaba igitero kuri Ukraine mu kwezi kwa kabiri uyu mwaka.
Leta y'Uburusiya yanashyizeho itegeko rikangisha abantu bakwirakwiza amakuru y'"ibinyoma" avuga ku ntambara, gufungwa imyaka 15.
Mu kwezi kwa gatatu uyu mwaka, Google, ifitwe na kompanyi Alphabet, yahagaritse gutanga ibikorwa by'ubucuruzi mu Burusiya, ibikorwa birimo nko kwamamaza.
Google yanongereye ibikorwa byo kubuza kugera kuri konti z'amakuru zishyigikiwe n'Uburusiya ndetse yimurira ahandi abakozi bayo.
Ariko, bitandukanye n'izindi mbuga nkoranyambaga nka Facebook, Google ntiyahagaritswe burundu mu Burusiya, aho telefone ngendanwa zigezweho (smartphones) nyinshi zicungira ku ikoranabuhanga ry'iyi kompanyi.
Mu kwezi kwa gatatu, Alphabet yavuze ko icyemezo cyo gukomeza gutanga serivisi z'ishakisha, amakarita na YouTube byatumye Abarusiya bagera "ku makuru no kumva ibintu mu buryo bwo ku rwego rw'isi".
Amande Google yaciwe ku wa mbere, yabazwe nk'umugabane w'inyungu y'iyi kompanyi mu Burusiya, abaye igihano cya mbere gikomeye cyane Uburusiya buhaye kompanyi y'ikoranabuhanga, nkuko byavuzwe n'ibitangazamakuru bya leta y'Uburusiya.
