France: Umusirikare yapfuye nyuma yo kuraswa mu mutwe arimo 'gukina' na bagenzi be

Umusirikare w'Umufaransa yapfuye nyuma yo kuraswa mu mutwe ari mu mukino na bagenzi be bari mu birori, nk'uko ibinyamakuru byaho bibivuga.

Brigadier Alexandre Lanckbeen yakomeretse bikomeye ku wa gatandatu ubwo yari mu birori asangira inzoga na bagenzi be bari ku bitaro bya gisirikare bya Percy i Paris mu Bufaransa.

Abashinjacyaha mu Bufaransa bavuga ko imbunda ya pistoret yarashwe mu cyo basobanura nk'umukino hagati y'abasirikare, maze isasu rikahuranya Alexandre mu mutwe.

Loïc Mizon, ukuriye igisirikare i Paris, yatangaje ku rubuga X ko yamenye "n'akababaro kenshi" urupfu rw'uyu musirikare w'imyaka 20 kuri uyu wa gatanu "bivuye ku bikomere".

Brigadier Alexandre Lanckbeen yakoreraga muri 35e Régiment d'Artillerie Parachutiste, akaba yari yoherejwe muri 'Operation Sentinelle' igikorwa kirekire cyo gucunga umutekano.

Abashinjacyaha bavuga ko ku wa gatandatu ushize nimugoroba, abasirikare bane bacumbikiwe ku bitaro bya Percy batangiye gukina umukino uzwi mu basirikare ugizwe no kugerageza kwambura intwaro mugenzi wawe no kuyivanamo amasasu.

Ubusanzwe iyo bawukina, imbunda nta masasu aba arimo ariko kuri aba si ko byari bimeze, nk'uko ibinyamakuru byaho bibivuga.

Mu mukino, isasu ryarasohotse ryahuranya Alexandre mu mutwe.

Bagenzi be batatu bari kumwe, ku wa kabiri bagejejwe imbere y'urukiko bigendanye n'ibyabaye.

Umwe muri bo yarezwe "urugomo rwifashishije intwaro rwavuyemo igikomere gihoraho no kurenga ku mabwiriza bakanywa inzoga", nk'uko amakuru abivuga.

Abandi babiri bivugwa ko barezwe "kubabaza bidakoranywe ubushake bikaviramo umuntu igikomere gikomeye".

Kugeza ubwo Alexandre yari akiri mu bitaro atarapfa.

Bagenzi be barezwe kandi "guhindura ahabereye icyaha bagamije guhisha ibimenyetso ku bucamanza".

Nyuma y'urupfu rwa Alexandre, byitezwe ko ibi birego biza guhinduka.