'Byari biteye ubwoba' – Umupilote wa JetBlue avuga uko yari agonganye n'indege ya gisirikare y'Amerika

Ubuyobozi bw'igisirikare mu majyepfo y'Amerika bwatangarije ibitangazamakuru ku wa mbere ko hari gusuzumwa icyari kigiye gutuma habaho kugongana kw'indege itwara abagenzi ya kompanyi JetBlue, n'iy'igisirikare cy'Amerika itwara ibitoro byo guha izindi ndege z'Amerika mu kirere, hafi ya Venezuela.

Indege itwara abagenzi yaturukaga ku kirwa cya Curaçao, kiri mu birwa bya Caraïbes, yahagaritse kuzamuka kwayo kugira ngo yirinde kugongana n'iyo ndege ya gisirikare.

Intera nyakuri yari iri hagati y'izo ndege zombi ntiramenyekana, kuko igikoresho kizwi nka 'transponder' cy'iyo ndege ya gisirikare y'Amerika – cyohereza amakuru y'aho indege iherereye kiyaha abagenzuzi bazo – kitari gicanye.

Mu itangazo yahaye BBC, kompanyi JetBlue yavuze ko abakozi bayo bari bari muri iyo ndege bamenyesheje ibyari birimo kuba ubuyobozi bw'iyo kompanyi ndetse ko "izagira uruhare mu iperereza ryose rizakorwa".

Indege ya JetBlue yari iturutse i Curaçao, ikirwa giherereye hafi y'inkombe ya Venezuela, yerekeza ku kibuga cy'indege cya JFK cyo mu mujyi wa New York.

Mu majwi yafashwe, umupilote wa JetBlue yagize ati:

"Habuze gato ngo tugongane mu kirere hano."

Yongeraho ati: "Banyuze neza neza mu nzira indege yacu yagenderagamo. ... 'Transponder' yabo ntiyari icanye, byari biteye ubwoba."

Yakomeje agira ati: "Twabonye indi ndege itunyuraho imbere mu ntera ya kilometero umunani — wenda nk'eshatu cyangwa enye — ariko yari indege ya Leta Zunze Ubumwe [z'Amerika] yongera ibitoro mu zindi ndege, ndetse [umupilote wayo] yari ari ku butumburuke bumwe n'ubwo twari turiho." "Twahise duhagarika kuzamuka."

Uyu mupilote yavuze ko nyuma yaho, iyo ndege y'igisirikare cy'Amerika yahise yerekeza mu kirere cya Venezuela.

Mu itangazo yahaye CBS News, igitangazamakuru gikorana na BBC muri Amerika, umuvugizi yavuze ko ingabo zirwanira mu kirere z'Amerika zizi iby'iki kibazo ndetse ko bari gusuzuma icyabiteye.

Yagize ati: "Abapilote ba gisirikare ni abanyamwuga batojwe cyane, bakora bakurikije amabwiriza yashyizweho hamwe n'amategeko agenga imikoreshereze y'ikirere."

"Umutekano uguma uri ku isonga [ni wo dushyira imbere], kandi turi kunyura mu nzira ziboneye kugira ngo dusuzume neza ibyabaye."

Ibi bibaye nyuma yuko mu kwezi gushize, ikigo gishinzwe ingendo z'indege za gisivile muri Amerika (FAA) kiburiye indege zo muri Amerika kizishishikariza "kwitwararika cyane" mu gihe ziri mu kirere cya Venezuela, "kubera uko umutekano ugenda urushaho kuzamba ndetse n'ubwiyongere bw'ibikorwa bya gisirikare muri Venezuela no mu nkengero zayo".