FBI yirukanye abayo bafotowe bapfukamye mu myiyerekano yo kwiyamiriza iyicwa ry'umwirabure George Floyd - ibinyamakuru

Ikigo FBI kijejwe igendereza ryo hagati mu gihugu muri Amerika cirukanye abakozi baco bafashwe amasanamu bapfukamye muri ca gihe c'imyiyerekano yo kwiyamiriza ivanguraruhu yateguwe inyuma y'urupfu rwa wa mwirabure George Floyd, nk'uko bivugwa n'ibinyamakuru vya Amerika bisubiramwo amasoko atavuzwe amazina.

Bivugwa ko aba bakozi bifatanije n'abandi mu gupfukama, mu myiyerekano yariko ibera i Washington DC mu 2020. Umwirabure Floyd yishwe n'umupolisi w'umuzungu yamupfukamye kw'izosi mu kwa gatanu kw'uwo mwaka, ubwicanyi bwiyamirijwe kw'isi yose.

Bivugwa ko aba bakozi baharurwa hagati ya 15 na 20 birukanywe ku wa gatanu – nubwo igitigiri nyezina kitaramenyekana neza.

BBC yabajije FBI ico ivuga kuri ibi ariko ntaco yavuze, ariko gusa ishirahamwe ry'abakozi bayo, FBI Agents Association, ryiyamirije iyirukanwa ry'aba bakozi, rikavuga ko uburenganzira bwabo bwahonyanzwe.

Amakuru yo kwirukanwa kw'aba bakozi aje mu gihe ubutegetsi bwa Trump buriko burondera gutuza ivyo bubona ko ari politike zishingiye ku bashira imbere ivyiyumviro vy'ubwigenge (gauche/left-wing) hamwe na poritike be n'abanyaporitike bashira imbere ukurwanya ivangura iryo ari ryo ryose (icitwa "woke"), mu mice yose ya reta y'igihugu.

Ku mbuga hwaniro, abatari bake mu bagendera ku vyiyumviro vya kera (droite/right-wing) baraneguye bikomeye aba bakozi hamwe n'abapolisi bafashwe amasanamu bapfukamye ico gihe.

Ariko ababashigikiye bavuga ko gupfukama yari amayeri yo kugabanya icuka kibi hagati yabo n'abari muri iyo myiyerekano, ko batari bafise intego yo kwerekana ko bari bashigikiye ivyiyumviro vy'abari bateguye iyi myiyerekano.

Iki gikorwa co gupfukama cabaye ikimenyetso co kwiyamiriza ivangura ruhu, inyuma y'uko videwo izungurutse ku mbuga hwaniro yerekana umupolisi w'umuzungu Derek Chauvin , ari na we yishe Floyd, amupfukamye kw'izosi mu kiringo c'iminota irenga icenda, yamufyondeye hasi.

Ibipimo vyakozwe amaze gucikana vyerekanye ko Floyd yishwe n'ingwara y'umutima yaturutse kw'ifyondekara ry'izosi. Chauvin ubu ari mw'ibohero aho yaciriwe imyaka 22 n'igice ku caha co kwica Floyd.

Gushira ivi hasi kandi vyari bimaze gukoreshwa muri Amerika mu kwiyamiriza akarenganyo gafatiye kw'ivanguraruhu be n'ubugome bwakorwa n'igipolisi imbere y'iyicwa rya Floyd – aha hakibukwa cane cane uwahoze ari umukinyi mw'ihiganwa ry'ikizwi nk'umupira w'amaguru wa Amerika, NFL (National Football League), Colin Kaepernick.

Aba bantu birukanywe ikivunga ni bo baherutse kwirukanwa mu rukurikirane rw'ukwirukana abakozi muri FBI.

Uwahoze arongoye iki kigo vy'imfatakibanza Brian Driscoll, uwahoze ari icegera c'umukuru waco yari ajejwe ibiro vya Washington Steven Jensen, hamwe na Spencer Evans, yahoze ari umukozi waco adasanzwe yari ajejwe ibiro vya Las Vegas, bose baherutse gusezererwa.

Mu ntango z'uku kwezi, aba batatu baritwariye umukuru wa FBI Kash Patel hamwe n'umushikirizamanza mukuru wa Amerika Pam Bondi, bavuga ko birukanywe mu ntumbero gusa yo gushaka gushimisha Perezida Donald Trump.

Mw'itangazo ryaryo ryo ku wa gatanu, ishirahamwe ry'abakozi ba FBI ryavuze ko iyi nkoro nshasha ya Patel iriko igira ingaruka mbi kuri FBI, kandi ko ikagabanya inguvu zayo, ibituma "bigorana kuronka no kugumana abakozi bamenyereye akazi - bikaba bishobora guta igihugu mu kaga".