Ubushinwa bwishe abantu 11 bo muri 'mafia' y'ubugizi bwa nabi n'ubwambuzi kuri internet

Ubushinwa bwishe abantu 11 bo mu muryango wa 'mafia' uzwi cyane wakoreshaga ibigo by'ubwambuzi kuri murandasi muri Myanmar hafi y'umupaka wabwo wo mu majyaruguru, nk'uko itangazamakuru rya Leta ribivuga.

Urukiko rwo mu ntara ya Zhejiang rwakatiye igihano cy'urupfu abo bantu muri Nzeri(9) umwaka ushize wa 2025, rubahama ibyaha birimo kwica abantu, gufunga abantu mu buryo butemewe n'amategeko, uburiganya, no kuyobora amatsinda y'imikino y'urusimbi itemewe n'amategeko.

Aba bantu bo mu muryango uzwi nka Ming wagenzuraga umujyi wa Laukkaing wo muri Myanmar, umujyi uri hafi y'umupaka w'Ubushinwa.

Muri icyo gihe, uwo mujyi wari ukennye cyane wahindutse ahantu huzuye inzu z'imikino y'urusimbi (casino), n'inzu z'uburaya bukomeye.

Ubu 'bwami' bwabo bw'ubuguzi bwa nabi bwaje gusenyuka mu 2023 ubwo bafatwaga bagashyikirizwa Ubushinwa bikozwe n'imitwe yitwaje intwaro ishamikiye ku moko yari yafashe Laukkaing mu ntambara barwana n'ingabo za Myanmar.

Ubwambuzi bukoresheje ubushukanyi kuri internet muri Aziya y'amajyepfo ashyira uburasirazuba butwara abantu miliyari 43$ ku mwaka, nk'uko bivugwa n'ikigo United States Institute of Peace cy'inteko ishingamategeko ya Amerika.

Ibikorwa by'uburiganya bikorerwa muri Myanmar bimaze imyaka myinshi bishimuta Abashinwa ibihumbi, bakagwa mu mutego w'aya mashyirahamwe y'ubugizi bwa nabi. Abashinwa ni bamwe mu bihumbi n'ibihumbi by'abantu bacurujwe bakajyanwa ku ngufu, aho bahatirwa gushuka no kwambura abantu bari mu mahanga bakoresheje mudasobwa.

Umwaka ushize, ku mbuga nkoranyambaga zo mu Bushinwa hakwirakwiye inkuru y'umukinnyi wa filime w'Umushinwa utari uzwi cyane, wari wagiye muri Thailand ku kazi ko gukina filime ariko akaza kujyanwa ku ngufu gukora mu kigo cy'uburiganya kiri muri Myanmar.

Ibi bigo bikoresha abantu mu gushaka abandi ku mbuga nkoranyambaga bakoresheje imyirondoro itari yo, ngo bashore imari mu mafaranga y'ikoranabuhanga (Crypto) ariko bagamije kubambura.

Izi nkuru n'izindi nk'izo zakomeje kongera umujinya n'uburakari mu butegetsi bw'i Beijing, bwari bumaze igihe busaba ubutegetsi bwa gisirikare bwa Myanmar guhagarika no kurwanya aya mashyirahamwe y'abatekamutwe.

Amaherezo, intambara hagati hagati y'igisirikare cya Myanmar n'imitwe yitwaje intwaro ishingiye ku moko yarakomeye bigera aho iyi mitwe ifata umujyi wa Laukkaing isenya uriya muryango w'ubugizi bwa nabi.

Umuryango wa Ming wari umwe mu miryango mike yigaruriye ubutegetsi n'ubukungu bw'umujyi wa Laukkaing mu ntangiriro z'imyaka ya 2000.

Hari nyuma y'uko uwahayoboraga yirukanwe na Min Aung Hlaing ubu akaba ari we uyobora ubutegetsi bwa gisirikare bwa Myanmar.

Mu myaka ya vuba, iyo miryango yaguriye ibikorwa byayo mu buriganya bwo kuri murandasi (cyberscams).

Mu bigo byabo binini byubakiwe uburiganya, hakorerwaga ibikorwa by'ubugizi bwa nabi bukabije, birimo ihohoterwa rikabije kandi rimwe na rimwe riganisha ku rupfu, nk'uko byemezwa n'ubuhamya bw'abakozi bari barafashwe bugwate nyuma bakaza kubohorwa.

Imitwe yitwaje intwaro yabonye amahirwe yo kwirukana iyo miryango, ubwo intambara yari imaze gufata indi ntera muri ako karere.

Nk'uko byatangajwe n'Urukiko rw'Ikirenga rw'Ubushinwa, ibikorwa by'uburiganya n'inzu z'imikino y'amafaranga za Ming byinjije arenga miliyari 10 z'amayuwani hagati ya 2015 na 2023.

Urwo rukiko rwanze ubujurire bw'aba bakatiwe urwo gupfa mu Ugushyingo (11) 2025.

Urukiko ruvuga ko ibyaha byabo byahitanye Abashinwa 14, abandi benshi barakomereka.

Muri 2023, abantu benshi bo muri aya mashyirahamwe barafashwe, muri bo 11 bakatiwe igihano cy'urupfu, mu gihe abandi barenga 20 bahawe ibihano byo gufungwa kuva ku myaka itanu kugera ku gufungwa burundu.

Imanza zabo, nk'uko bimeze ku manza nyinshi mu Bushinwa, zaburanishijwe mu muhezo, n'ubwo abantu barenga 160 bemerewe kwitabira isomwa ry'ibihano byabo umwaka ushize, nk'uko itangazamakuru rya Leta ryabitangaje.

Abakatiwe igihano cy'urupfu bahuye n'abagize imiryango yabo ya hafi mbere yo kwicwa, nk'uko byatangajwe ku wa Kabiri.

Ming Xuechang, umukuru w'umuryango wa Ming, bivugwa ko yiyahuye mu 2023 nyuma yo gufungwa.

Abagize aya mashyirahamwe bafashwe bagizwe inkuru mu biganiro bya televiziyo bya Leta, bigaragaza ukwemera ibyaha kwabo n'uko iperereza ryakozwe, ibintu abasesenguzi bavuga ko ari uburyo Leta y'Ubushinwa ikoresha mu guhosha uburakari bw'abaturage no kugaragaza ubushake bwayo bwo kurandura burundu imiyoboro y'uburiganya bwo kuri murandasi.

Kuva mu mwaka wa 2023, ubutegetsi bw'Ubushinwa n'ubwa Myanmar bumaze guta muri yombi Abashinwa barenga 57,000 bakekwaho kugira uruhare mu buriganya bwo kuri murandasi, nk'uko itangazamakuru rya Leta ribitangaza.